Mahitabo kini kun dawaton ni Digong ang hagit ni Mar nga magsinagpaay sila. Pero kun nakahinumdom kamo, si Digong ang nanguna niini pinaagi sa pag-ingon nga kun magkasugat silang Mar, iya kining sagpaon tungod sa dinad-an niini sa bagyong Yolanda.
Mibalos si Mar sa pag-ingon nga dili katuohan ang gipanghambog ni Digong nga kalinaw sa Davao. Sa Facebook, adunay nag-post nga wala sa rekord ang Davao nga usa ka safest place in the world.
Mibalos usab si Digong sa pag-ingon nga bakak ang panghambog ni Mar nga gradwado kini sa Wharton School. Apan ang Rappler.com nagkanayon nga ang Wharton tipik sa University of Pennsylvania diin didto migradwar si Mar sa kursong Economics, mao nga ngilngig kini sa ekonomiya.
Unsa may rason ni Digong nganong awayon man niya si Mar? Siya man kahay labing taas og rating sa survey?
Sa laing bahin, nganong patulan man ni Mar si Digong nga bisan ang pagkabastos sa baba ni Digong dili man katupong sa iyang pagka-seryoso, mao ganing saypan siya kanunay’ng usa ka konyo o adunahan.
Pero sa uban, ang dagway ni Mar nga usa ka konyo ang kinahanglan sa nasud. Matud sa uban, mag-unsa man nang bastos ang presidente apan ang nasud gubot kay wala’y puas ang pinatyanay, unya ang presidente manghagit og sukmagay sa ubang presidente unya balikason hasta ang Santo Papa?
* * *
Hapit na magsugod ang kampanya sunod buwan, diyutay pa lang sa mga lokal nga kandidato ang madunggan kalabot sa ilang mga plataporma de gobiyerno.
Sa Sugbo, si Winston Garcia daghan og plano pagpalambo sa Sugbo, apil na ang paglibre sa serbisyo sa mga ospital sa lungsod. Si Gob. Junjun Davide mopadayon ra gyud sa iyang nasugdan nga limpyong panggobiyerno.
Sa siyudad sa Sugbo, si Mayor Mike Rama naanad sa plataporma nga panghatag (doleout) nga wala’y konkretong programa alang sa tanan. Ang kampo ni Tomas Osmeña igo ra gyud sa pagpakgang sa mga buhat ni Mike, sama sa pagwaldas sa halin sa South Road Properties.
Sa Mandaue maoy alegre kay sa kadako ni Luigi Quisumbing, maglisod kini sa pagpangampanya suot sa mga sitio. Wala usab kini hidunggi unsay plataporma niya alang sa Mandaue.
Si Lolypop Ouano-Dizon wala’y puas ang pagtuyok sa mga baryo pagpaminaw sa suliran sa katawhan, aron kabasehan sa iyang plataporma de gobiyerno.
Ang alegre mao ang panagsakbang nilang Dr. Paulus Mariae Cañete ug Mayor Jonas Cortes. Kay wala man moatras si Cortes pagka-bise mayor, mag-abot gyud sila ni Cañete.
Ang nakapait kay nasuko kang Jonas ang mga tawo sa Consolacion ug Cordova tungod sa iyang giduso nga ‘lone district of Mandaue’ nga moresulta sa pagbiya sa duha ka lungsod.