Dear Atty. Divine,
Lima na ako ka tuig nga nagtrabaho ning mao nga kompaniya nga namaligya og liempo ug litson-manok. Apan wa gyud ko sukad makadawat og 13th month pay. Apil ba ko nga makadawat og 13th month pay? Unsa may angayan nako nga buhaton aron mohatag og 13th month pay kining akong gitrabahoan? Daghang salamat. — Jose
Dear Jose,
Kining 13th month pay, mandatory kini sa tanang pribado nga kompaniya nga diin kinahanglan gyud silang mohatag niini sa ilang mga trabahante matag tuig sa dili pa ang Disyembre 24. Kun ang imong gitrabahoan wa mohatag kanimo og 13th month pay sulod na sa lima ka tuig, dako kini nga kalapasan sa balaod ug mahimo nimo nga ireklamo ang maong kompaniya ngadto sa Department of Labor. Ayaw kahadlok kay imo kana nga katungod. Ang maayo nimo nga buhaton karon mao ang pagpangutana sa inyong HR department kun aduna bay 13th month pay nga i-release ang imong gitrabahoan karon. Kun wa gani gyud kay 13th month pay, pasakai og reklamo ngadto sa DOLE kay posible nga dili lang ikaw ang wa hatagi og 13th month pay ug angay nila nga bayran ang 13th month pay sa milabay’ng katuigan nga wa ka nila hatagi. Kun mahadlok ka nga modangop sa DOLE mahimo ka nga magpadala kanila og suwat reklamo, then dili ka lang magpaila apan imong idetalye ang imong reklamo, ang pangan sa imong gitrabahoan, ang ilang address ug ang ilang location aron kini masubay sa taga DOLE ug aron manubag ning imong employer ug mabayran ka sa unsay alang kanimo base sa balaod. - Atty. Divine
Alang sa inyong pangutana, ipadala sa Legal Corner sa Banat News sa V. Gullas St., Cebu City or email sa flores_divina@yahoo.com ug akong tubagon ang inyong pangutana pinaagi sa akong column matag Miyerkules, Sabado ug Domingo.