Nagsugod na og panggawas ang mga nagkadaiyang preventive suspension orders, suspensyon ug pagpanaktak gyud sa pwesto batok sa mga naglingkod nga mga elected public officials nga nag-atubang og nagkadaiyang mga administrative cases. Apan di kalikayan nga madudahan gyud nga adunay bulok politika ang maong mga kamandoan tungod kay nahitabo man nga ang gisuspenso sakop sa karibal nga partido samtang ang nagsuspensong buhatan matawag nga kaalyado o kontrolado sa ilang kaatbang nga partido.
Dili hinuon tanang gisuspenso pulos lang gikan sa karibal nga partido kay aduna man gyuy daghan pud nga kaalyado sa kasamtangang administrasyon.
Ang pangutana sa publiko nganong aduna man gyuy mga kaalyado sa Malacañang nga gisuspenso na ug gani aduna pay gi-dismiss na sa serbisyo tungod sa pagkakombikto sa kasong ilang giatubang ug gidid-an nang makabaton og bisan unsang posisyon sa gobiyerno , apan hangtud karon padayong naglingkod sa pwesto ug nagdawatan og sweldo ug aduna pay nagpa-reelect.
Hinuon bisan nahukman ug aduna nay gipaubos nga silot dili pa gyud kini makonsiderar nga pinal nga desisyon hangtud nga di makatubag sa hustong hukmanan ang giakusahan. Unya kini ra bang ligid sa hustisya sa Pilipinas pwerteng hinaya motuyok, busa usahay modaog na lang pagbalik ang mga giakusahan ug bisan kadtong mga nahukman na nga pasilotan apan wa pa gihapoy pinal nga desisyon kun angay ba gyud nilang serbisyohan ang silot o dili.
Mao na nga di kalikayan, ang katawhan magduda sa kaligdong sa gobiyerno bisan na kadtong nanglabay nga mga administrasyon, kun seryuso ba kini sa kampanya niini kontra kurapsyon ug pag-abuso sa mga naglingkod sa pwesto. Bisan taguon pa sa mga nagpaluyo niining mga kaso batok sa mga giakusahang opisyal ang ilang tinud-anay nga motibo, masabtan man nga daw gituyo kini aron piangan ang ilang kaatbang.