Ang Commission on Audit (COA) nagpagawas og taho nga ang lalawigan sa Sugbo mao ang labing dato sa tanan nga probinsya sa nasud human kini moposte og P28 bilyones nga equity.
Kining equity, sigun sa pagpasabot sa COA, mao kini ang balanse human giiban ang mga bayranan sa lalawigan sa Sugbo gikan sa iyang kita. Dato diay ang Sugbo.
Tungod niining maayong balita sa COA, nag-ilog sila si kanhi gobernador ug karon Kongresista Gwendolyn Garcia ug ang kasamtangan karon nga gobernador sa Sugbo nga si Hilario Davide III.
Si Gwen miingon nga sa iyang panahon pagka gobernador ang pagka numero uno sa lalawigan sa Sugbo, apan si Davide miingon sab nga sa iya na nga panahon nahimong numero uno ang probinsya.
Matud ni Davide nga bakak ang pangangkon ni Gwen tungod kay sa iyang pagpuli pagka gobernador sa Sugbo, bangkarota ang panudlanan sa lalawigan.
Maayo kaayo nga mangangkon sila si Junjun ug Gwen sa pagka numero uno sa lalawigan kun hisgotan ang kita niini.
Kaayohan gani, labi na og makapasikat, maayo kaayo mangangkon ning mga politiko pero tan-awa kun ang pagkapalpak maoy ibalita, wala gyuy mangangkon.
Ang mahitabo, mag-iyahay lang og binasolay ug magtinukmoray kun si kinsa ang angayan nga manubag.
Salamat sa COA kay may mabasehan ang mga taga lalawigan sa Sugbo sa ilang pagpaningil og mehoras gikan sa ilang mga opisyal.
At least nakahibawo na ang gobernador nga aduna diay salapi nga iyang magasto para sa katawhan nga iyang gikalimtan. Porbida no?