Gibanabanang 15,000 ka lokal ug langyaw’ng delegado ang manambong sa International Eucharistic Congress (IEC) nga himuon sa Dakbayan sa Sugbo sa Enero sa sunod tuig. Hakuton sila sa 100 ka higanteng buses nga gikontrata sa Artsidyosesis sa Sugbo padung ug gikan sa IEC Pavilion ug sa hotels ug pribadong mga pinuy-anan.
Unsaon paghakot, pagpakanaog ug pagpasakay ang mga delegado gikan sa venue nga nahimutang taliwa sa usa sa labing huot nga bahin sa dakyanan? Di gamay ning problemaha. Angay’ng tanyagan sa tanang simpatiya ug pangaliya ang mga tigpasiugda. Nakalili na tingali sa kalisod nga ilang giatubang human sa duha ka adlaw nga dry run niadtong Domingo ug Lunes.
* * *
Matud ni Padre Wendell Balbuena, pangu sa transportation committee, gituyo nila nga Lunes ang ikaduhang adlaw sa dry run aron mahibaw-an nila unsa kapaspas o kadugay ang biyahe sa mga delegado gikan sa nagkalainlaing bahin sa Metro Cebu sa mga adlaw sa IEC nga may klase ug may trabaho.
Masaligon siya nga makaabot ang mga delegado sa tukmang panahon sa mga sesyon sa IEC nga magsugod matag alas-8 sa buntag nga di kinahanglan nga tak-opan ang tibuok St. John Paul II Avenue ug nga di mamugna ang higanteng kahasol sa trapiko nga makatanggong sa mga tinun-an ug mga trabahante nga moagi sa kasilinganan nga kadalanan.
* * *
Nagdali si Padre Balbuena sa among panagsulti kay may gitambongan pang tigom uban sa kadagkoan sa Mactan Cebu International Airport maong wa kong kapangutana niya sa labing batakan nga sukaranan sa bisan unsang time and motion study: Mga numero.
Pila ka pasahero ang masud sa matag bus? Unsa kadugay nga makakanaog ug makasakay ang mga delegado, nga maglakip sa mga hamtong ug persons with disabilities, sa buses? Pila ka round trip ang kinahanglan nga himuon sa matag bus aron mahakot ang tanang delegado sa gitakdang panahon di lang sa IEC Pavilion kun dili hasta sa ubang mga dapit nga pahigayonan sa mga Santos nga Misa ug ubang kalihokan?
* * *
Nakahatag hinuon si Padre Balbuena og pasiunang mga numero sa wa pa mananghid nga mobiya kay nagsugod nang ilang tigom: Manghakot na sila sa mga delegado sugod sa alas-6 sa buntag aron makahimo ang buses og upat ka round trips sa di pa magsugod ang unang sesyon sa buntag; napu ka buses ang makasud sa tugkaran sa Pavilion ug mas daghang buses ang makaparada sa mas duol nga gate sa Cardinal Rosales Avenue ug sa main gate sa St. John Paul II Avenue.
Matud ni Balbuena nauyonan sa mga tigpasiugda nga dasigon ang mga delegado nga magpuyo sa duol nga hotels pagbaktas paingon sa venue aron pagsegurong mahakot ang mas lagyo nga mga delegado.