Naabusohan na og maayo kining gitawag og "Aguinaldo Doctrine" sa mga kanhi opisyal nga nalambigit sa kurapsyon ug daghang anomalya sa pagdumala sa ilang katungdanan.
Ang maong doktrina gi-adopt sa Korte Suprema kaniadto pang dekada 50 apan ning bag-ohay lang nipagawas og hukom ang labaw nga hukmanan nga dili na kini mahimong gamitong depensa sa mga gipangkiha nga opisyal.
Swerte pa si Makati Mayor Jejomar Erwin "Junjun" Binay Jr. tungod kay siya maoy kataposang ilado kaayong public official nga makabenepisyo pa sa gahom sa maong doktrina. Si Binay gikiha may labot sa pasangil nga anomalosong pagtukod sa Makati Science High School Building (MSHSB) ug sa Makati City Hall Parking Building II.
Apan kun mapinalisar na ang desisyon kabahin sa iyang kaso, wa nay makagamit pa niini isip pangdepensa ug kinahanglang atubangon nila ang ilang mga kaso. Kini nga pamahayag dakong puntos alang sa mga tawong nakigbatok sa kurapsyon nga kaniadto pa nakabantay nga naabuso na kini og maayo.
Ang maong doktrina makadaghang higayon nang nagamit sa mga elected officials sukad nga kini gipatuman. Mao kini hinungdan nga daghang mga kurakot nga politiko ang pirmeng makalingkawas gikan sa ilang mga kaso matag higayon nga masublian sila sa ilang katungdanan pinaagi sa eleksyon.
Sa maong paagi, kadtong adunahang mga politiko nga makahimo pagpamalit og boto sigurado gyung makalingkawas sa ilang pagpangawkaw.
Kay mapapas man pinaagi sa maong doktrina ang tanang kahiwian nga ilang nahimo tungod kay gibotaran man gihapon sila sa mga tawo ug ang pagsabot niini sa doktrina, gipasaylo na sa iyang mga konstituwente sa iyang mga sala ang maong opisyal.
Karon nga wa nay kapuslanan ang Aguinaldo Doctrine, magmatngon na siguro ang mosunod nga molingkod nga elected officials.
Kay bisan og ma-reelected pa sila sa pwesto apan mamatud-an nga sad-an sa una nilang termino, mahimo gihapon silang prisuhon.