Gamay nga sweldo o nihit gyud ang oportunidad sa panarbaho sa Pilipinas hinungdan nga daghan kaayo ang manimpalad sa gawas sa nasud aron mahatagan og mahayag nga kaugmaon ang pamilya.
Kun daghan man ang giswerte ug niasenso sa pagpanarbaho sa abroad aduna usay daghan nga pamilya ang naungkag ang pagpuyo gumikan sa daghan nga mga tentasyon sa lawasnon nga kaibog nga mosangpot sa pagbudhi ug panagbulag.
Sama na lang sa nahitabo sa usa ka OFW nga bag-o lang nipauli sa iyang pamilya sa dakbayan sa Mandaue nga dili makadawat sa mapait nga sinugatan sa iyang mahal ug pinalangga nga asawa. Dihang mi-abroad siya balon ang mga pangandoy niya ug sa iyang asawa nga mao ang paghatag og maayo nga kaugmaon sa tulo nila ka mga anak. Apan dihang mipauli ang bana nga OFW nahimong upat na ang anak sa iyang asawa.
Mas makapakugang ang linoog nga krimen sa iyang 28 anyos nga misis aron matabonan ang gihimo niining pagbudhi kauban ang laing lalaki. Gipugos sa babaye sa paghimugso ang bata nga anaa sa iyang sabakan ug gilabay sa sapa nga hilabihan ka hugaw.
Ang saksi nga mitaho sa pulis mitug-an nga nakadungog siya og uha o hilak sa bata hinungdan nga posible nga buhi pa kini ug didto na namatay sa tubig. Mas gipalig-on pa kini sa resulta sa autopsy nga nagpositibo sa lung floatation test ang patay nga lawas sa bata hinungdan nga gipasakaan ang babaye og kaso nga infanticide.
Ang katarungan nganong nabuhat sa babaye ang krimen mao nga nahadlok siya sa iyang bana kinsa mouliay na gikan sa abroad niadtong higayona. Kun wala na man lang gyud makapugong ang asawa ug nagpadala siya sa tentasyon unta gibarugan na lang niya ang sala nga nahimo ug wala na niya pun-i pa og mas dako nga sala sa langit ug sa yuta diin iyang giunay sa pagpatay ang kaugalingon niyang liwat.
Sakit kaayo palandongon nga nagwadwad og maayo ang bana sa trabaho sa gawas sa nasud apan ang asawa nagpawadwad pud sa laing binuhat.
Pagkatampalasan nga walay sama!