Ang katalagsaon sa gahum sa panghunahuna, lakip na ang hiyas ini'ng positibo'ng kinaiya, mao'y maghimo og mekanismo sa paglampos. Nga adunay kapabilidad nga motudlo sa kinabuhi segun sa iyang pangagpas o mahunahunaan nga angay planohon. Ug dili sab motugot nga wala'y kahimoan.
Makahukom ug makaila ka kun kinsa ka sa imong kaugalingon. Mahimo kang malaumon nga pagkatawo, nga adunay kaligdong - imahe, nga kontrolado ang kaugalingo'ng kinabuhi. Nga anaa ra kanimo nag-agad ang tanan sa imong kabubut-on, kun unsa'y angay aron makapalambo sa imong panghunahuna.
Imo lang kini kapuslan, sa higayon nga ayagon mo pag-ayo ang malungtaron epekto niini, nga maghatag maayong kalamboan. Iseguro nga di ka madaug sa mga kadismaya, nga iunlod ka'ng himuo'ng ulipon nga mao nay modiktar kanimo ang gahum sa mga gipanghunahuna.
Hangtud nawad-an sa maayo'ng kabuot, nga itul-id ang lig-ong pundasyon sa kinabuhi. Kay nakasandig sa kaugalingon paglaom, gumikan sa kahubog sa kalampusan nga naangkon. Nahikalimtan ang tinubdan sa gahum sa iyang panghunahuna. Kay maulahi man g'yud ang pagmahay, igo na lang sa pangagho.
Busa ampingan nga di mausik ang tumong o mga pangandoy sa kinabuhi nga magdugay nato kini kapahimuslan. Mao'y pandayon sa kaisipan, nga pangayuon sa kahitas-an ang gahum sa panghunahuna, nga kita kanunay niyang giyahan nga makabaton og malinawon ug malipayo'ng kinabuhi.
Unsa ma'y damgo o pangandoy ni'ng kinabuhia, himoang tamdanan sa kinabuhi ang kabubut-on sa Dios. Isalig Kaniya ang gahum sa atong panghuna-huna, kay Siya ang nakakita sa mga epekto sa kaugalingon nato'ng kapasidad sa panghunahuna, nga kalagmitan mosangko gayud sa kaulawan ug kapakyasan.