Dear Atty. Divine,
Dunay yuta nga gipalit sa among parents nga ilang gidata-datahan, apan namatay ang akong papa ug wala nila mahuman sa pagbayad ang yuta.
Mihangyo nako si mama nga ako ang motiwas sa pagbayad sa kuwang. Minyo na ang akong mga igsuon ug ako na lang ang single.
Ang akong pangutana mao kini. Kun akong tiwason sa pagbayad ang yuta, may katungod ba ang akong mga igsuon nga mangayo sa ilang share kun mawala na ang akong mama?
Unsa ang akong buhaton aron dili na makapangayo ang uban nako nga igsuon sa ilang share sa maong property? Daghang salamat. — Gina
Dear Gina,
Mas maayo nga imong tiwason ang pagbayad sa maong yuta nga gidata-datahan sa imong parents. Apan kun gusto ka nga maimo na gyud sa hingpit ang yuta, imong i-refund ang imong mama sa tibuok nga kantidad nga ilang nabayad na, ug imo gyud nga papirmahon og dokumento ang imong mama nga imo siya nga gi-refund sa ilang nabayad sa property ug imo ‘sab nga sultian ang imong mga igsuon aron masayod sila nga ikaw na ang nagbayad sa tanan sa maong yuta.
Kun maimpas na nimo sa pagbayad ang yuta, then ang tag-iya niini mo-execute og Deed of Absolute Sale ubos na sa imong pangan. Thanks and God Bless. - Atty. Divine
* * *
Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa flores_divina@yahoo.com ug akong tubagon ang inyong pangutana pinaagi sa akong column matag Miyerkules, Sabado ug Domingo.