Naukay ang dakbayan sa Sugbo sa nahitabong pagpamusil sud sa usa ka kan-anan sayo niining semanaha nga miresulta sa kamatayon sa duha ka Chinese diplomats ug pagkaangol sa ilang Consul General.
Magtiayong Chinese nationals usab ang mga suspek nga ang babaye kanhi consul sa Chinese Consular Office nga parehong adunay "diplomatic immunity" subay sa kasabotan sa gobiyerno sa Pilipinas ug sa Peoples Republic of China.
Wala pay klaro kun unsay dangatan sa kaso karong giingon nga adunay "diplomatic immunity" ang mga suspek, o dili sila mahimong lutoson sa atong balaod dinhi ilabi na kay ang mga biktima ilaha rang kababayan.
Ang tutokan unta sa kapolisan mao ang kalugak gihapon sa seguridad mao nga nahitabo ang maong krimen.
Angay tutokan sa pagkakaron sa kapolisan ang kabahin sa kapakyas sa gwardiya sa paghimo sa iyang trabaho.
Nganong nakasulod ang maong armas diha sa maong kan-anan nga gigamit sa krimen.
Angay usab tan-awon ang report nga ang gwardiya nangangkon nga wala siya mosud sa nahitaboan kay niungot ang hammer sa giisyu niyang armas.
Kun tinuod kini, dili ba maayo nga ipatawag sa kapolisan ang ahensya sa maong gwardiya?
Nganong moisyu man sila og armas nga dili diay magamit sa ilang sakop bisan na lang gani pagpanalipod unya sa iyang kaugalingon?
Unsaon man nila pagpanalipod unya sa mga gibantayan kun ingon niini ang kalidad sa seguridad sa mga suroyanan, kan-anan nga bisitahon kanunay sa mga langyaw.
Ang Sugbo matud pa sa usa ka report ika-19 sa labing maanindot nga island destination sa kalibotan. Angay unta nga hasta ang kalidad sa mga security agencies ilaha pud tarungon kay usa sila sa mga mamahimong makatampo pagpalambo sa turismo dinhi sa Sugbo.