Tungason kaayo ang gisubay nga dalan sa mga Pilipinong Muslim nga nagtinguhang makabaton og awtonomiya pinaagi sa pagtukod og Bangsamoro didto sa Mindanao. Matud nila solusyon kini aron makab-ot ang tinud-anay nga kahapsay, kalinaw ug malambuong pagpuyo sa mga Muslim, Kristiyano ug Lumad sa maong isla. Sa pagsugod pa lang sa Comprehensive Agreement on the Bangsamoro (CAB), ug nasundan sa paghikay sa Bangsamoro Basic Law (BBL) human sa pinirmahay (2014), nabulit dayon og mga pag-atake ug pagduda dili lang sa mga kritiko niini kondili hasta sa mga yanong mga Pilipino.
Kini nga sabot-kalinaw ikatulo na sa dul-an 40 ka tuig nga suway pagpahilom sa mga armas ug ang pagbanaw sa dugo sa mga Pilipino didto.
Gisuwayan kini niadtong 1976 nga gitawag og Tripoli Agreement , ikaduha niadtong 1996 nga gitawag og Final Peace Agreement ug natukod ang Autonomous Region in Muslim Mindanao.
Apan matud pa daghang buslot ang ARMM kay way awtonomiya nga nahitabo sa mga molupyo sa Bangsamoro. Nganong wala man matagbaw ang mga rebeldeng Muslim sa maong duha ka mga kasabotan?
Karon gikatahong aduna na usab gipanangtang nga mga probisyon sa BBL diha sa bersyon sa Senado samtang gipaabot pa ang bersyon gikan sa Ubos Balaybalauranan.
Kadto untang mga probisyon nga gituyo pagbutang aron makorihian kadtong mga hinungdan nganong napakyas ang duha ka peace agreements di na panangtangon basta dili lapas sa Konstitusyon kay ang balaod, kun dunay buslot mahimo mang amendahan o rebisahon.
Dili pa ba gihapon panahon karon aron usbon na ang panglantaw sa kinabag-an ngadto sa mga Pilipinong Muslim? Kay kun di kini mausab, magpabilin ang pagduda nga dili patas ang atong pagtagad ngadto kanila maong naingon ana sila.
Unta si Pres. Benigno Aquino III, kinsa maoy ikaunom nga presidenteng misuway paghusay sa problema, mao nay kataposan nga mohimo niini human sa 42 ka tuig nang kagubot sa Mindanao.