Ambot unsay nahunahuna sa editor sa pamantalaan. Gidawat niya ang tampo nga sinuwat sa kamot sa gum-os nga yellow pad gikan sa batan-on nga nagkadusingot, klarong nagbaktas gikan sa kinadul-ang kanaoganan sa PUJ sa dan Colon. Bisan sa kadaghan sa gimbuhaton ug mga kawani nga giduma, gibasa niya ang tampo, nihiyong og diyutay ang mga mata, klarong naglisod kay giminolde.
Inay abugon ang batan-on ug tambagan nga motiwas una og eskuyla ug modugang una pagkat-on sa pagsuwat, gihapyod niyang papel ug nagpahiyom nga nidasig sa magtatampo sa pagpadayon pagsuwat ug nipasalig nga iyang paabuton ang dugang pang mga sinuwat.
* * *
Mao toy sinugdanan sa akong mga tampo sa The Freeman. Si Sir Juanito V. Jabat ang ni-ulog-ulog nako sa pagsuwat. Pagkabati sa iyang kamatayon gahapon, mas nahinuklog kong naghunahuna sa iyang kaaghop og balatian ug kamanggihatagon sa mga pagdasig. Usa lang ko sa kapid-an nga nahatagan niya sa talagsaong kahigayonan.
Mas masaaron ang sinugdanan sa akong panuwat kay sa bantogang peryodista nga mas unang nitaliwan, si Cerge Remonde. Una niyang tampo, makinilyado, gidiretso paglabay sa basurahan nga wa gani basaha sa editor. Nahibaw-an niya nga mao toy kasagarang himuon sa karaang mga tagduma pagbansay-bansay sa mga bag-o. Salamat nga si Mr. Jabat lahi sa iyang mga kadungan.
* * *
Tungod sa pag-abi-abi ni Mr. Jabat, nagpalaban ko sa akong uyoan, si anhing Tiyo Loring, nga mao ray akong nahibaw-ang may makinilya. Nga gibitbit nakong magdagan gikan sa ila sa Tabunok paingon sa amo sa San Isidro, Talisay aron nga di mauwahi sa klase. Gawas pa, pila ka oras rang magamit, iuli dayon kay gikinahanglan pagsuwat sa mas mahinungdanon reports sa Kapitolyo nga maoy iyang gitrabahoan.
Nakumbinser ni Mr. Jabat, nipada sab ko og mga tampo sa Bisaya ug sa mga sibyaanan sa radyo. Si Cerge ang nimatuto nako sa radyo apan si Mr. Jabat ang nipalili nako sa bintana sa ligdong nga panginabuhi sa media.
* * *
Bisan sa iyang kainila ug sa pagdayeg sa labing gamhanang mga politiko ug labing adunahang mga negosyante niya, nagpabilin si Mr. Jabat nga yano, matinagdanon ug matinabangon sa mga linghod nga sama nako nagduhiraw pagsud sa media. Gipamatud-an niyang mas epektibo ang mga pagtulon-an nga ipaagi sa pakatawa kay sa pangasaba.
Naghupot siya sa talagsaong gasa sa kamatinud-anon. Dihang gibudhian ang The Freeman sa mga kanhi tagduma, si Mr. Jabat nipili sa pagpabilin. Alang niya mas mahinungdanon ang pagtuman sa saad kay sa katigayonan. Di sab hakog og mga sekreto. Siya ang nagtultol nako sa sekretong agianan paingon sa The Freeman nga di ko kinahanglan nga moubog sa lawom ug lubog nga baha sa Colon. Sa imong paghangop ug paggiya, daghang salamat, Mr. Jabat!