Ang nahisgutan nato sa miagi'ng lindog, mao ang kolesterol nga sagad maoy hinungdan sa mga pagkaparalisar sa lawas ug atake sa kasingkasing. Unya ato sad gipaila ang mga pang-alibyo ini, sama sa dulaw o turmeric ug parsely. Karon, ipadayon nato ang uban pa'ng natural nga pang-alibyo sa kolesterol;
* Flaxseed — Makatabang sab kini sa pagpaubos sa dauta'ng kolesterol, nga kini mao'y mga tinubdan sa dagha'ng 'omega-3 fatty acids' ug 'dietary fiber'. Ang liso ini nga kakuhaa'g lana, makapaalibyo sab sa mga problema sud sa atong ginhawaan (gastrointestinal tract), sama sa kalibang, butod, wa kahilisi o konstipasyon ug ulser. Mas maayo'ng gamiton ang 'ground flaxseed' para dali matunaw. Sayon sab ni'ng ibalibod nga idugang lang sa pagkao'ng 'cereals' o 'yugort'. Luwas kini sa kadaghanan sa mga tawo, apan duna sab ni ginagmay nga 'side-effects', sama sa pagpangaslom, medyo kasukaon ug kalipongon.
Magmatngon sa paggamit ini, ilabi na kadtong aduna'y 'diabetes' ug mga pasyente'ng may problema sa di-kapugnga'ng pagdugo (bleeding disorder).
* Ahos — Naila kini'ng 'anti-clotting' o mosanta sa pagbara sa kaugatan ug moabag sab sa pagtunaw sa dauta'ng kolesterol, nga ipataas ini ang normal nga lebel sa maayo'ng kolesterol. Mahimo kini'ng tumaron nga panitan ang lusok sa ahos, pwede sab ang tabletas, capsula, o pinulbos ini. Aduna'y 'extract oil' o lana nga gikan sa ahos, makapabaho kini sa gininhawa (halitosis), mora'g kabuhion (heartburn) nga usahay may pagsuka ug kalipungon.
Ang normal nga 'dosage' sa pagtumar og ahos, mao ang 900mg matag adlaw. Kini sumala sa rekomendasyon sa 'University of Maryland Medical Center. Timan-an lang nga matud pa, mas maayo gamiton ang presko'ng hilaw o mismo'ng lusok gayud sa ahos nga pinanitan, nga samaran o hiwaa'g gamay.