Usa ka makalilisang nga panghitabo niadtong Septiyembre 28 didto sa Barangay San Miguel, Cordova. Usa ka 8-anyos nga bata namatay tungod sa pag-malfunction sa paboto nga gitawag og "bombshell."
Nagpahigayon og fireworks display sa maong lugar atol sa pagsaulog sa ilang pista apan imbes kasadya ug paghudyaka ang ilang nasinati, kasub-anan ug kalisang ang nahitabo.
Ang nagpahigayon sa fireworks display gibalhug sa Cordova Police Station ug gipasakaan og tukmang kaso. Gani duna pa'y usa ka panimalay ang partially damage sa kakusog sa explosion.
Ang tigpasiugda wala mikuha og permit sa Cordova Fire Station nga usa unta kini ka rekisito sa dili pa ipahigayon ang fireworks display. Sa dili pa kamo mopahigayon og fireworks display, mokuha usa kamo og permit sa fire station sa inyong lugar.
Kini aron ang kabomberohan makapadala og mga personnel nga mosusi samtang kini giinstalar pa ang mga pabuto ug kun kinahanglan magpa-standby og fire truck aron masiguro nga walay sunog.
Dili kay anha na kita magkisi-kisi kun may mahitabo na nga trahedya ug may makalas na nga kinabuhi. Unta dili na kita makadungog pa og susama nga panghitabo sa umaabot.
Gani ang inyong kabomberohan karon subsob na sa pag-monitor ug pag-conduct og inspeksyon sa mga lugar diin may buhatan og mga fire crackers aron masuta ang safety measures sa maong mga pabrika.
Ang nakapaet kay adunay daghang ilegal nga tighimo og pabuto nga wala’y permit gikan sa kapolisan. Maoy hinungdan nga makig-coordinate kami sa kapolisan aron madakop ug masakmit ang maong mga ilegal nga pabuto.
Kun may namatikdan kamo diha sa inyong lugar nga nanghimo og pabuto, ayaw kamo pag-duhaduha sa pag- report sa among opisina sa numero 256-0553 aron amo dayon kining mapadalhan og fire safety inspectors.