Dili makalimod ang mga politiko nga bisan og wala pa magsugod ang “official election campaign period” alang sa mga kandidato, apan daghan na ang nagsugod pagpangampanya.
Ang nakapasamot sa pagkasalawayon sa uban nga mga politiko, kay sagad kadtong anaa karon sa aktibo nga serbisyo, kay gamiton nila ang mga butang sa kagamhanan aron pagpalambo sa ilang kandidatura.
Dili makabasol si Cebu City Councilor Gerardo “Gerry” Carillo nga daghan ang misaway kaniya tungod kay ang iyang mga gipasiugdahan nga Karaoke Singing Contest sa kabarangayan, migamit man og multicab nga gipanag-iya sa kagamhanan.
Daghan ang miyamiid sa argumento sa konsehal nga nangangkon nga kabahin gihapon sa iyang pagserbisyo ang pagpahigayon og Karaoke Singing Contest diha sa lainlaing barangay ug dili usa ka pagpamolitika.
Sa wala pa mabulgar sa publiko ang reklamo batok ni Carillo, ang iyang mga staff abtik kaayo nga mo-upload sa Facebook sa mga Karaoke Singing Contest nga gihimo nila sa lainlaing barangay ug anaa ang hulagway sa konsehal.
Kun gihimo pa kining mao nga singing contest nga gipasiugdahan ni Carillo kaniadtong layo pa kaayo ang eleksyon, mahimo nga dili magduda ang katawhan nga gigamit kini niya alang sa iyang propaganda.
Karon nga nagkaduol na ang eleksyon sa 2016, angay nga magmatngon ang mga kandidato, ilabi na ang mga anaa karon sa gahum. Angay nga dili sila mogamit og mga butang sa kagamhanan sa ilang mga tigom nga gitumong sa pagpangampanya.
Panahon sa kampanya, ang mga opisyal nga magpapili pag-usab sa katungdanan, dili angay nga mogamit sa ilang mga service vehicles sa pag-adto sa lainlaing pulong-pulong aron paghatag og patas nga sitwasyon sa ilang mga kontra. Sa ingon niini nga paagi, daghan ang modayeg kanila.