Human iitsa ni Senador Grace Poe ang kawo sa politika aron moapil sa three-cornered fight sa 2016 presidential election, nagkadaghan ang mga netizens nga mikuwestiyon sa iyang citizenship ug kaangayan modagan pagka presidente bisan sa iyang pagka-Amerikana.
Mga panglantaw’ng legal nagkanayon nga kun ang usa ka natural-born nga Filipino moadto sa Amerika ug adto manumpa nga moyukbo siya sa bandera sa Amerika ug depensahan niya ang US constitution, unya mobalik siya dinhi, dili na niya makuha pagbalik ang pagka-natural born kay paaplayon siya isip “naturalized Filipino citizen.”
Ang gilantaw dinhi dili ang katungod ug kagawasnon sa kanhi Filipino nga miputol sa iyang relasyon tali sa yuta niyang natawhan unya mobalik aron mopapili sa eleksiyon, kon dili ang gibuhat niini nga pagkalas makausa sa iyang pagka-Filipino.
Makadaghan mi-disqualify ang Korte Suprema sa mga mayor, gobernador ug kongresista kay lagi makausa mibiya sa nasud ug miadto sa Amerika ug nanumpa didto aron mahimo na sila nga Amerikano. Kining mga desisyona, gamiton ba kaha sa Senate Electoral Tribunal ug sa ngadto-ngadto sa Korte Suprema batok kang Grace?
Kun mahitabo nga modaog si Grace Poe ug si Senador Chiz Escudero pagka presidente ug bise presidente, unya ma-disqualify si Grace kay Amerikana lagi, kuyaw nga ang labing oportunista nga si Chiz ang molingkod nga presidente.
* * *
Puwerte’ng sukoa sa mga miyembro sa kooperatiba lukop nasud sa upat ka House Bills nga nagtinguha nga tangtangon ang tax exemption sa tanang mga coop.
Nanguna sa maong paninguha mismo ang Sugboanong si Kongresista Luigi Quisumbing pinaagi sa iyang House Bill 2765. Uban niya silang Susan Yap sa Tarlac, Rufus Rodriguez sa Cagayan de Oro, ug Maximo Rodriguez sa Abante Mindanao party-list. Ilang tuyo nga ma-repeal ang Articles 60 ug 61 sa Cooperative Code of the Philippines aron wala nay tax exemption sa mga coop.
Kahibalo ba kaha si Luigi ug iyang mga kauban nga unconstitutional kini? Niadtong miaging semana, nahimo nga bisita si Luigi sa usa sa mga meeting sa kooperatiba dinhi sa Sugbo ug mipasabot nga wala (kuno) siya kahibalo sa iyang gipirmahan. Unsa?
Dili ko motuo nga sa pinirmahay sa House Bill, gihimo ni Luigi ang iyang kaugalingon nga “sleeping giant” aron matulog ini’g pirma.
Naggikan sa adunahang pamilya si Luigi. Nanag-iya sila og dako kaayong kompaniya. Busa, dili kita makapaabot nga mobati si Luigi sa kalisod sa mga tawo ug unsa kadako nga tabang niana’ng mga kooperatiba aron mahaw-as sila sa kalisod.
Kana kay mipirma siya, masabot kaayo nga ang intensiyon ni Luigi mao nga lisudlisuron ang
mga kooperatiba aron mosamot og kapobre ang pobre nga mga miyembro niini pinaagi sa pagpapas-an og buhis gikan sa kita sa ilang kooperatiba.