Sa miagi, ang katapusan nato'ng nahisgutan ang 3ka sangputanan o mga hinungdan sa depresyon. Nga magbunga og kadaut sa utok o panghunahuna, nga moresulta sa pagkamalimtanon ug mawad-an sa maayo'ng kabuot.
Ang pag-alkontra ini'ng depresyon, mas makaayo gayud nga kanunay mo mabati ang kahimuot sa kaugalingon mo. Sama sa paghingatawa sa mga kahigalaan o mga tawo diha sa palibot. Hasta ang buhat nga matinabangon sa silingan ug uban pa. Mao ni makabuntog sa tuma'ng kalaay o kamingaw, aron maprotektahan ug mamintin ang maayo nimo'ng memorya, nga di ma-'depress'.
Ang makigdaiton nga pagpakiglambigit sa katilingban, maisip kini nga usa sa bililho'ng ehersisyo sa utok. Kay pagbaid man kini sa memorya nga molantip, nga sa pagtabi dali ra makatimaan sa ngalan sa mahimong bag-ong kahimamat. Ang pakighinabi o pakigsandurot nga mahimut-anon, makapaus-os sa hayblad, ug makahimsog sa utok, ilabi na sa memorya o panumdoman.
Ang kamingaw o depresyon, mawagtang kun himuon nato'ng kinabuhi nga makitawhanon nga adunay maayo'ng relasyon sa katilingbanon nga kaakohan diha sa aktibong pakiglambigit sa tana'ng kalihokan. Ang utok o panghunahuna, moabtik nga alisto sa paghimo'g mga dalaygon mga ideya nga makadulot og mga benepisyo sa katilingban. Ni'ng bahina, molig-on sab ang atong pagkatawo.
Ikonsiderar sab ang atong spirituwal nga obligasyon, nga ang pagduol permi sa Dios, mas gamhanan nga makapalig-on nga mohimsog ang atong utok. Ang pamalandong nga isumbong ang kamingaw o kagul-ana'ng gipas-an, pagaanon kini sa kanunay nga pagluhod. Mabatyagan ang kaluag sa atong gipamati nga kahayahay sa kaisipan. Makahatag usab kini og paglaum sa tukma'ng kahulugan sa panghunahuna aron mous-os ang lebel sa depresyon.