Gitak-opan sa Cebu City Transportation Office (CCTO) ang tibuok agianan sa South Coastal Road habig sa dagat sugod sa alas-5:30 sa hapon niadtong Sabado. Duha ug tunga ka oras sa dili pa ang gitakda nga pagsugod sa Color Manila Blacklight Edition-Cebu.
Wa’y bisan unsa nga pahibawo nga gibutang ang CCTO ug ang mga tigpasiugda sa pagtak-op sa karsada ug nisangpot kini sa grabe nga kahuot sa mga sakyanan nga nagsawo na lang sa nahibiling bahin sa dan.
Nakapasamot sa kasakit sa dughan sa natanggong nga mga motorista ug mga pasahero nga sa gitak-opan nga bahin sa dan wa’y bisan usa nga nagtikaw-tikaw. Hangtud sa paglabay namo sa alas-8:15 sa gabii wa pa makasugod ang lumba.
* * *
Diha nga nanawag ko sa CCTO pagpakisayod ngano nga wa sila moluwat og mga pahibawo pagpasidaan sa publiko nga tak-opan ang tibuok seaside lane sa South Coastal Road, ang babaye nga nakatubag nako niingon nga ang traffic advisory ilang gi-post sa Facebook page sa “CITOM Official.”
Pag-abli nako sa page, nabasa nako ang lista sa “ACTIVITIES ON SEPTEMBER 5, 2015 (Saturday). Mao ni ang ikatulo sa listahan: “BLACK LIGHT MANILA-CEBU LEG RUN” at 5:30 PM ROUTE = From SRP Senior Citizen Bldg., LT going to VIADUCT seaside, U-turn at Maritima follow again SRP seaside U-turn at Parilya follow again SRP seaside RT going back to Senior Citizen Bldg.
* * *
Wa sila maghisgot og tak-op sa dan. Igo lang gipahibawo ang rota sa dagan. Bisan nakabasa pa ang tanang motorista di g’yud sila maalerto nga kinahanglan diay nga likayan ang SRP sugod sa alas-5:30 sa hapon.
Pila sa mga motorista ug pasahero ang may access sa Facebook? Pila sa mga may FB ang nakatultol sa ilang page? Miabot lang og 4,300 ang mi-likes sa “CITOM Official.”
Dili hinuon sila ra ang napakyas paggamit sa bag-o nila nga ngalan. Bisan si Mayor Mike Rama motawag gihapon sa CCTO nga CITOM ug maglisod paglitok sa apelyido sa bag-ong executive officer nga si Atty. Rey Gealon.
* * *
Nipasalig si CCTO Operations Chief Joy Tumulak sa pagtawag sa atensiyon sa mga tigpasiugda sa Color Manila Blacklight Edition-Cebu sa ilang kapakyas pagpasidaan sa mga motorista ug mga pasahero.
Usa sa mga panginahanglan sa CCTO nga posible’ng nalapas mao ang pagbutang og traffic advisory sa duha ka tumoy sa rota pila ka adlaw sa dili pa ang lumba.
Wa kasusi si Tumulak sa pagkabara sa trapiko sa SRP niadtong Sabado sa gabii apan gipahibawo sa iyang supervisors nga naablihan pagbalik ang dan pagka alas-9 sa gabii.
Nireklamo hinuon ang mga motorista nga serado pa nga seaside lane pasado alas-10 sa gabii. Ug nga bisan ang taga CCTO wa kapasabot nila sa kalihokan.
* * *