Ang mga hunahuna nga gipadayag dinhi iya ra sa tagsulat ug walay labot ang Banat News ug mga sakop niini.
Sir,
Maayong adlaw kaninyong tanan diha sa Banat News.
Unta mahatagan og lugar sa Banat News, ang numero uno nga mantalaan nga gibasa karon sa masa dinhi sa dakbayan sa Sugbo, kining akong ipaambit nga opinyon sa pagkadakop ni Maria Concepcion Araneta-Bocala alyas Concha.
Dili ko mahibulong ngano nga kadaghanan sa mga dagko nga lider sa Partido Komunista dinhi man g’yud masikop sa ato masiko sa kapolisan ug military. Pareho sa mag-asawa nga Tiamzon ug ang labing bag-o ang pagkadakop ni Concha.
Kompiyansa man gud sila kay ang ilang pagtuo daghan sila og mga tigsuporta diri sa Cebu. Wala lang sila masayod nga daghan na ang nasuko sa ilang grupo, ilabi na ang paghimo nila og rally.
Dako’ng perwisyo sa dakbayan ug katawhan kining ilang mga kalihokan ug dautang katuyoan. Ilang giilad, dili lang ang atong mga inosente nga kaigsuonan nga mga mag-uuma, kun dili lakip na gihapon ang atong kabataan, kay kuno sila ang modapig sa ilang kalisdanan.
Pero, ngano nga hangtud karon, 46 anyos na ang ilang pakigbisog ug misamot man nga nahumol sa kalisud ang atong mga farmers? Ang tubag niini mao ang ilang pagsige og pangayo kanila’g pagkaon ug kantidad para kuno sa rebolusyon. Subra pa sila sa makililimos kay apilan man nila og panghulga ug pagdaug-daog ang ilang gibuhat.
Busa awhagon nako ang tanang ginikanan nga magpakabana unta sila sa mga aktibidad sa atong gobiyerno nga sumpuon sa hingpit kining kalihokan sa mga rebelde.
Ang mga rebelde padayon sa ilang pagpangrekrut sa atong mga estudyante ug kabataan nga moapil sa ilang grupo. Nagpasalamat ko nga nadakpan kini si Concha nga nag-atubang og kaso nga pagpatay ug illegal possession of firearms and explosives.
Atong ipadayon ang pagmabinantayon ug panalipdan ta ang Demokrasiya nga gisakripisyohan sa atong mga Bayani ug gi-ampingan natong tanan.