Ang tsismis, sagad ang naa sa atong interpretasyon sa usa ka tawo'ng mahilig niini, kalagmitan makaguba o makabungkag sa maayo'ng relasyon. Hangtud mosangpot sa kasamok o panag-away. Unya mahunahuna nato nga dili angay makigsandurot niini’ng klaseha sa kinaiya basin og maamong pa kita.
Apan lahi ni'ng ato'ng nadiskitahan ron, sa higala ko'ng silingan nga labihan ka tsismosa gikan sa buntag magabhi-an na lang, kay kugihan kaayo nga tua na permi magyampungad sa gawas. Ilado na ni siya sa among dapit. Ang naka-intriga nako, daghan ang mangita niya kay may ihangyo ug uban pang katuyoan.
Ako mismo ang nibisita sa ilang balay aron matugkad gayud ang tinuoray niya'ng pagkatawo. Wa ko magdahom nga kakuhaan ko siya'g ehemplo sa katalagsao'ng motibo niya sa kinabuhi. Niya pa, dili dautan ang tsismis kon di mo lang ugkaton nga dauton ang ilang mga katungod o pagkatawo.
Mao lama'y prinsipyo niya ni'ng kinabuhia, nga makatanom siya'g maayo'ng buhat aron ang tanan makasalig kaniya. Makigsandurot nga matinud-anon, nga abli permi mohanyag pagtabang bisan sa kaapiki usab sa iyang kahimtang. Kay kalipay niya ang mga tawo nga molig-on nga malaumon diha sa mga paglaum.
Sa pagkakaron, ang ganti sa iyang pagkamaunongon sa isigkatawo, wala niya damha nga kini naghata'g oportunidad sa iyang mas malambuon nga kinabuhi. Talagsaon ang ingon niini nga diskarte kay nagkinahanglan kini og lig-on nga determinasyon nga pursigido g’yud tinguhaon ang pagpaubos ug kaisog sa pailob.
Moabot man nga mabug-atan ka's personal mo'ng suliran, aduna ka na'y kapahungawan aron ikaw ila na usab katabangan tungod sa pagsalig nila kanimo