Dunay pasiunang klaro nga magbangga sa presidential elections sa 2016. Sila si Interior Secretary Mar Roxas sa Liberal Party ug si Bise Presidente Jejomar Binay sa United Nationalists Alliance.
Gawas sa mosunod pa unyang mokandidato sa maong posisyon, ang duha dili na mga ihalas sa trabaho kun basehan ang ilang kasinatian. Kung wala lay kwartahay , anhi nila daugon sa kung kinsa ang dunay maayo og plataporma ug panglantaw alang sa kaugmaon sa Pilipinas.
Sayo niining tuiga ug sa uwahing bahin sa tuig 2014 daw kalit nahimong popular sa katawhan si Binay ilabi na sa iyang pagsuroy-suroy sa nagkadaiyang mga dapit sa nasud, ug makita kini sa mga surveys ug nakatabang kini pagpataas sa iyang kompiyansa nga siya nay modaog nga sunod pangulo sa nasud.
Apan dihang nialisngaw ang kabahin sa mga alegasyon nga kurapsyon sa dihang siya pay mayor ug karon sa anak niining mayor sa Makati City ug ang mansion sa Tagaytay nitibugsok ang iyang ratings.
Matinuod man o dili nagbunga kini og negatibong epekto sa iyang tinguha sa 2016 tungod kay hangtud karon nagkaanam kadaghan ang nisaway kaniya sa mga social networking sites.
Ang tanang pasangil iyang gihimakak ug nagtuo siyang sabotahe kini aron pugngan ang siguro na niyang kadaogan.
Samtang si Roxas aduna pay tulobagon sa publiko nunot sa gihulagway sa mga kritiko sa gobiyerno nga palpak nga rehabilitasyon sa mga naapektahan sa katalagman niadtong 2013.
Daghan pa kaayong mga biktima ang wala pa hingpit nakaangkon og permanenteng pinuy-anan mao sigurong ang pirmeng madunggan gikan sa gobiyerno bahin niini pulos pa lang gihapon plano ang nahuman.
Kining maong mga negatibong pasangil batok sa duha duna kini gibug-aton alang sa mga botante ug sa mga direktang naapektahan ug kini maoy angay nilang sulbaron samtang nagkaduol na ang eleksyon.