Naghuot na usab ang mga dalan paingon sa mga dapit bakasyonanan nunot sa taas nga linya sa mga adlaw nga walay trabaho kabahin sa pag-obserbar sa mga Katoliko sa Semana Santa.
Sigun sa akong naobserbahan sulod sa pipila ka katuigan, mura’g naandan na sa mga tawo sa Pilipinas ang pag-adto sa mga dapit bakasyonanan atol sa Holy Week.
Sama sa gikonsiderar na sa uban ang Semana Santa nga panahon sa pagbakasyon ug dili panahon sa pagpamalandong sukwahi sa gitudlo sa atong simbahang Katoliko.
Hinuon, basin pud og dili mga Katoliko kini’ng mga tawo nga tua nag-ambahan sa mga dapit-kaligoanan pero kun sila mga Katoliko, mura’g nahisalaag ni sila sa ilang dalan.
Ang Semana Santa sigun sa gitudlo kanato sa atong simbahan mao ang panahon sa pagbalaan ug sa paghinulsol sa mga kasal-anan nga atong gikonsiderar nga kalapasan sa kasugoan sa atong Ginoo ug sa mga pagtulon-an nga gitudlo kanato sa atong simbahang Katoliko.
Busa ni’ng maong panahon, adto unta kita magtapok sa simbahan ug dili sa mga dapit bakasyonanan ug kaligoanan.
Kun ngano’ng naa sa mga dapit bakasyonanan ug kaligoanan nagtapok ang ubang mga Katoliko, mao kini ang wala nato masabti ug wala nato masayri tungod kay wala man nato sila mapangutana.
Seguro aduna gayud sila’y mga rason nga mas importante pa kay sa pagtamod sa mga kalihokan sa atong simbahan ni’ng panahon sa Semana Santa.
Maayo unta nga bisan og wala sila sa simbahan lig-on gihapon ang ilang pagtuo sa atong Ginoo. Sama sa gisulti ni Manila Archbishop Cardinal Tagle nga siya naglaum nga kita magmatinud-anon sa atong pagka Katoliko.