Nakahinumdom si Mayor Michael Rama nga diha’y higayon human sa iyang pagdaug pagka mayor nga may tawo nga mihangyo kaniya nga tugotan kini nga maka-operate og ilegal suwertres dinhi sa dakbayan.
Gibalibaran ni Mayor Rama ang hangyo nga mag-operate og ilegal suwertres ang maong tawo apan mahimo’ng walay kalibotan ang mayor nga adunay ubang tawo nga midupa sa ilegal nga kalihukan.
Angay g’yud nga ipatinuod ni Mayor Rama sa kapolisan ang paghimo og kampanya aron mahunong na ang operasyon sa ilegal suwertres nga giingong giproteksyonan pa sa pipila ka polis. Dako’ng hagit ni Cebu City police direktor Marciano Batiancela ang pagsumpo sa mao nga ilegal nga kalihukan aron imatuod niya sa mayor nga takus siya nga mohupot sa katungdanan.
Ang nakalisod lang sa kahimtang ni Senior Superintendent Batiancela mao nga mahimo’ng may ikabangga siya nga mga kauban niya nga polis kun mohingusog siya sa paghimo’g kampanya.
Apan kun matinud-anon si Batiancela sa iyang katungdanan sigurado nga mapuhag niya ang ilegal nga kalihukan kay daghan siya og mga kaila nga makahatag niya’g inpormasyon.
Kapin na sa 20 ka tuig nga si Batiancela nadistino dinhi sa dakbayan sa Sugbo. Apan ang operasyon sa ilegal suwertres dili gayud mosanay kun ang mga opisyal sa kabarangayan wala pa motugot sa mao nga ilegal nga kalihokan.
Sama diha sa Barangay Pahina San Nicolas nga adunay duha ka booking outlet sa suwertres nga nag-operate duol g’yud sa barangay hall.