MARSO 22, 2015:Ikalimang Domingo sa kuwaresma
Mga Pagbasa: Jer. 31;31-34/Sal. 51/Heb. 5;7-9/Jn. 12;20-33
Sa pagsulti sa atong Ginoo niini, kini nakapunting sa iyang kamatayon didto sa balabag sa krus. Apan ang maong kamatayon maoy kinapungkayan usab sa kahimayaan ug pasidungog nga iyang madawat gikan sa Dios. Ang maong kamatayon nagdala og kaluwasan alang kanatong mga masalaypon. Pamalandongi kining mga puntoha:
1. Unsay imong pagsabot sa Krus?
2. Sa matag higayon nga pagapas-anon mo ang Krus unsang pagbatia ang nihari kanimo?
3. Nahimo bang babag ang imong kaugalingong mga suliran nga tungod niini dili ka na hinuon manginlabot sa suliran sa uban?
Hapit na ang Semana Santa. Tukmang panahon kini aron sa ingon himoon nato ang mas personal nga pagsusi kun nahimo ba kitang mahigalaon sa atong mga krus sa kinabuhi. Kay hinumdomi, dili kita makasabot sa kahulogan sa Domingo sa Pagkabanhaw kondili kita maantigong modawat sa Domingo sa Kasakitan.