Wala malilong sa kapolisan ug sa mga opisyal sa Barangay Ermita nga adunay mga batan-on nga anak sa mga lumolupyo diha sa Sitio Bato nga anha mag-standby sa tulay nga agianan paingon sa South Road Properties.
Daghan na ang mga motorista nga mireklamo nga pipila niini’ng mao nga mga batan-on manglabay og bato sa mga moagi nga sakyanan. Duna gani pipila ka motorista nga nabuk-an sa windshield nga naigo sa bato.
Kanus-a pa man molihok ang atong kapolisan ug ang mga tanod diha sa Barangay Ermita? Unya na ba kun may mga motorista nga dili na makaagwanta ug pangpusilon ang mao nga mga batan-on?
Angay’ng badlongon ug did-an ang mao nga mga batan-on nga mi-convert sa mao nga dapit sa viaduct duol sa Sitio Bato, Ermita nga susama sa public plaza.
Dili public plaza ang mao nga dapit diha sa viaduct (tulay sa dagat) ug wala sila’y katungod ang maong mga batan-on nga moestar diha’ng dapita.
Kay aduna may mga tawo nga mireklamo na sa mga binuang niini’ng mao nga mga batan-on, angay na gayud nga molihok na ang atong kapolisan ug mga tanod sa Barangay Ermita.
Kun pasagdan kini sa mga tinugyanan sa balaud ug sa mga opisyal sa Ermita ang mao nga mga batan-on, hayan moabot ang higayon nga kadto’ng mga motorista nga ilang gibinuangan pinaagi sa paglabay og bato mobawos g’yud kanila.
Ang gikabalak-an sa uban mao ang panultihon nga wala’y sukod sa bawos.