Sa wala pa molingkod sa katungdanan ang mga pinili nga opisyal, manumpa sila nga motuman gayud sa balaud. Apan diha ra diay kini sa tumoy sa ilang dila.
Mao kini ang gihimo ni Makati City Mayor Erwin “Junjun” Binay nga nagdumili sa pagtahud sa kamandoan sa Ombudsman nga nagmando nga ipaubos siya og unom ka buwan nga preventive suspension.
Ang Ombudsman usa ka Constitutional Body nga gimugna pinaagi sa Republic Act 6770 ug gihatagan kini’g gahum pagsilot sa mga malapason sa balaud nga naglambigit og pagpangawkaw.
Kini’ng kang Junjun Binay dili pa gani kini silot, preventive suspension ra kini aron nga dili siya maka inpluwensya sa dagan sa imbestigasyon sa kaso nga gipasaka batok kaniya, sa iyang amahan nga si Vice President Jejomar Binay ug ubang mga opisyal sa Makati.
Si Vice President Binay dili mahimo nga ibutang ubos sa preventive suspension kay matangtang lang siya kun palagputon pinaagi sa Impeachment Proceedings.
Nagluklok sa City Hall sa Makati si Binay ug didto matulog sa iyang opisina sa kabalaka nga inigbalik niya dili na siya mayor.
Gitambagan si Mayor Binay ni Quezon City Congressman Christopher Belmonte nga atubangon ang balaud ug dili kay magtago sa iyang opisina.
Ang kaso sa amahan ug anak nga Binay naglambigit kini sa giingon nga gi-overprice nga pagpatukod sa Makati City Parking Building. Ngano kaha nga mahadlok man sila motubag? Lisud tubagon?
* * *
Ang gireklamo nako nga pagtukod og kabahin sa balay dapit sa eskena Sikatuna ug T. Padilla hapit na g’yud mahuman apan wala g’yud gihapon aksyoni sa City Hall demolition team nga gipangulohan ni Raquel Arce.
Sa kagamay ug kasayon sa mao nga gimbuhaton naglisud na sila’s Arce. Wala g’yud sila mauwaw nga gipakyas nila pagtuman ang numero uno nga kahulogan sa ila’ng grupo – Prevention.
Mao kana nga bisan ang paglitok sa mao nga pulong nga kunohay maoy kahulogan sa ilang grupo hilasan na kaayo ko. Sa laktod, ingnon na lang nako nga City Hall clearing team.
Apan unsa man sa’y ilang i-clear, ang mga tapangko lang sa mga tighimo og lapida? Ang mga bukag lang sa mga tindera nga puno sa baligya maoy ilang pang-alsahon?
Huwaton g’yud ninyo nga mahuman aron mosamot nga maglisud na kamo paghawan? Asa na man tawon ang inyong mga utok uy.
Pasultiha, puwerte kaayo manulti nga mura g’yud og tinuod. Pabuhata, wala g’yud tawon. Maghuwat ba lang kita nga ang mayor ang mosugo aron ta maka-award?