Matud pa, kadaghanan didto sa America, diin gibanabana nga 50 milyones ang nag-antus sa arthritis. Mao kini sagad ang nakapainutil sa ilang paglihok. Unsaon kulang kuno sa kahibalo kun ngano ug unsa may mga hinungdan niini, maingon man ang pag-ila sa mga klase niining sakita.
Tungod kay managsama lang bation ang panakit apan managlahi ang mga hinungdan. Gikinahanglan masayud o makaila gyud kita sa matang niini, aron pagtukma sa mga remedyo nga atong buhaton, aron dili kita grabeng mag-aguroy. Busa atong sabton pag-ayo kining mga mosunod nga klase sama sa:
* RHEUMATOID - Tungod kini sa kayamukat sa 'auto-immune' sa lawas, diin ang tumong sa atake niini mao ang mga lutahan o mga 'joints. Manakit ni kun mangadaut, ilabi na ang gagmay nga bukog sa kamot, pulsohan o braso.
* OSTEOARTHRITIS - Tungod kini sa kadaut sa 'cartilage' nga nangahilis na, maong mosakit kay nawala na kadtong tisyo nga depensa sa isigka-'joints' sa bukog nga nagbaghiray. Mograbe ni kasakit kun subra o kulang sa paglihok.
* JUVENILE ARTHRITIS - Tungod gihapon sa kayamukat sa 'auto immune' ug sa kondisyon sa panakit (inflammatory) nga motakboy inig 16 ang edad o paubos. Way klaro kun unsay sinugdanan ini. Gituohan nga gumikan ni sa mga 'inter-actions' sa 'genes' ngadto sa pagkaon o mga 'allergy' o toksins.
* PSORIATIC ARTHRITIS - Tungod kini kun may sakit sa panit nga psoriasis, nga mograbe ni kasakit kun mamula na nga ingon sa manghubag. Hinoon, dili tanang lutahan o parte sa mga 'joints' sa kamot ang manakit.
* GOUTY ARTHRITIS - Tungod sab ni kun grabe nang may mga pondong 'uric acid' sa dugo, bisa’g hikap lang mosakit. Mosamot labi na’g way ehersisyo.