Gisaway ni Bise Presidente Jejomar Binay si DILG Secretary Mar Roxas tungod kay wala masayod sa gilusad sa gobiyerno nga Oplan Exodus aron pagdakop unta sa terorista nga si Marwan. Si Binay nagkanayon nga dili maayo ang liderato ni Secretary Roxas tungod sa iyang pagka itsapuwera sa kasayoran nga angayan unta niya’ng masayran isip labaw sa DILG kay ubos man niini ang kapolisan nga nagpatuman sa Oplan Exodus.
Kun imong subayon ang linya sa argumento ni Binay mura’g buot ipasabot niini nga ang basehanan sa usa ka maayo’ng lider mao nga mahibalo gayud kini sa tanang kasayoran nga angayan nga masayran.
Kay ang bise presidente nanaway man ni Roxas ug miingon nga dili kini maayo og liderato, buot ba niya’ng ipasabot nga mas maayo siya og liderato?
Kay ang maayo’ng liderato gibase man ni Binay sa mga kasayoran nga iyang nahibaw-an kanunay, masabot ba nato nga nahibawo usab siya sa tanang anomaliya sa Makati City busa dili kini makapanghimakak niini?
Kay maayo ang liderato ni Binay base sa mga kasayoran nga iyang nahibaw-an, mao ba kini ang hinungdan kun ngano’ng wala g’yud siya motunga sa gipahigayong imbestigasyon sa Senado mahitungod sa mga proyekto sa Makati nga gipaburot ang presyo diha’ng siya pa ang mayor kay nahadlok siya’ng mabisto nga dili tinuod ang iyang mga panghimakak?
Wa kaha ka maunay sa tari niini Mr. Vice President?
* * *
Pasalamat diay sa Cebu Diamond Lions Club nga gipangulohan sa ilang presidente nga si Atty. Marchel Sarno, Cebu City North District Comelec Officer ug Mr. Richard Rodriguez, presidente sa Cebu First Chinese Royal Academy sa Dumlog, Talisay City, Dr. Alice Utlang, executive director sa Cebu City Office for Substance Abuse Prevention (COSAP), Ms Atup, Kevin Guym, Sir Randyl Kundiman ug mga tinun-an sa SWU tungod sa ilang pag-abag ug pagtambong sa malampusong anti-illegal Drug Seminar nga gipasiugdahan sa New Generation Against Drugs and Corruption Inc. (NEWGAD, INC.) kaniadto’ng Sabado sa buntag didto sa AVR3 MHAM Building, SWU, Cebu City. Kaninyong tanan, daghang salamat.