Kudos na usab ngadto sa kapolisan sa Metro Cebu, ilabina sa dakbayan sa Sugbo, gumikan sa ilang sunod-sunod nga kadaugan batok sa kampanya sa gidili nga druga. Ug ato usab nga pasidunggan ang dakong kooperasyon sa komunidad niini.
Nagpasabot lamang kini nga nagkakusog na karon ang paggukod sa otoridad niadtong mga padayong nalambigit niini nga maong klase sa negosyo. Ug klarong nagpangurog na karon ang mga drug dealer ug pusher paghunahuna nga basin sila na usab ang masignit sa otoridad.
Sa nakalabay nga mga semana, milyones ang kantidad sa shabu ug marijuana ang nasakmit sa kapolisan sa Sugbo. Kadaghanan niini nakuha sa otoridad dinhi sa Metro Cebu, ilabina ning dakbayan sa Sugbo.
Tungod niini, maka-expect kita nga monihit ang suplay sa druga dinhi sa Sugbo taliwala niining nagkainit usab nga kampanya sa otoridad. Ug kun mokunhod ang suplay, sigurado usab nga momahal ang presyo niini.
Kining maong kalampusan sa otoridad warning usab ngadto sa mga nalambigit sa negosyo sa ilegal nga druga nga maihap na ang adlaw sa ilang operasyon. Ug nga mas maayo pa nga mamutos na lamang sila ug mobakwit gikan sa Sugbo kay dili gayud sila lung-an paggukod sa otoridad.
Hinuon dili gayud masilhig ang tanang nalambigit niining maong ilegal nga negosyo. Sa ka dako sa Sugbo, padayon gayud ang sirkulasyon sa shabu ug ubang gidiling druga sa mga barangay sa probinsiya, ilabi na sa Metro Cebu. Usa sa rason niini mao nga adunay mga drug dealer ug pusher ang adunay koneksiyon sa otoridad.
Tungod lagi kay abunda sila sa salapi, sayon lamang nila ang pagsuborno sa ubang sakop sa kapolisan.
Dili ikalimod nga adunay pipila ka bugok sa police force kinsa mga protector usab sa mga drug dealer. Gani, mitumaw ang taho sa niaging mga adlaw nga siyam ka pulis sa dakbayan sa Sugbo ang namiligro nga mataktak sa serbisyo tungod sa ilang pagkalambigit sa ilegal nga druga.
Angay lamang nga seryosohon kini sa otoridad. Kay dili gayud molampos ang kampanya kun mismo ang atong gisaligan paggukod sa mga nalambigit sa ilegal nga druga mao na hinuon ang nagprotehir niini.