Nakabasa ko sa sinuwat nga lindog ni Rene Borromeo nga napatik sa inyo’ng isyu karong adlawa (Pebrero 19) nga midayeg sa mga sakop sa PROBE nga mihawan sa aseras diha sa dalan V. Gullas.
Sigun sa lindog, gipangsakmit sa mga sakop ni Raquel Arce ang mga ginalon nga tubig ug ang traysikad nga gamiton sa tigbaligya’g tubig nga nasakpan nga diha giparada sa aseras atubangan sa tindahan.
Apil ako nga nakadayeg sa gihimo ni Madam Raquel Arce apan makapangutana lang ko kun ngano nga mura’g duna man siya’y pinili? Ngano’ng gipasagdan ra man niya ang mga naninda nga miukopar pa gani sa aseras sa dalan Legaspi?
Nagsunod ko kanunay sa mga lindog dinhi sa Banat News ug nabasahan nako nga dugay na kaayo kini nga gihisgotan ang mao nga ilegal nga kalihokan sa mga naninda diha, apan ngano’ng wala man gayud kini tagda?
Kaniadto’ng miagi’ng Domingo nga gikan ko nga misimba, anha g’yud ko moagi diha’ng dapita kay diha man moagi ang mga jeep pasaheroan nga nagbiyahe paingon diri sa among dapit sa Mambaling. Nakita nako nga hilabihan g’yud kasamok ang mao nga dapit. Dili na nimo makita ang aseras nga anha unta moagi ang mga tawo kay gibutangan na man kini og tindahan. Misaylo pa gani sa karsada ang tindahan.
Kun tinuoray man nga patas ang pagpatuman sa balaod, hagiton nato ang PROBE ug si Madam Arce mismo nga himoan niya og diha-diha nga aksyon kini’ng mao nga dugay na kaayo’ng reklamo. Nakabantay ko nga grabe kaayo ang trapik diha sa Legaspi Street ilabi na kun ang Osmeña Boulevard nga kilid sa Basilica del Santo Niño dili paagian og mga sakyanan panahon sa Biyernes.
Magpasalamat ‘sab ko ni Rene Borromeo nga padayong mituki sa mga isyu pagpahapsay sa atong dakbayan. Usbon ko, alang ni Madam Raquel Arce, kinahanglan nga ipakita nimo nga makiangayon ka sa pagpatuman sa balaod.
Mohapsay ang atong dakbayan sa Sugbo kun ang mga opisyal sa kagamhanan, sama ni Raquel, molihok lang g’yud alang sa kaayohan sa kadaghanan.