Pagkaanindot unta kun sama pa kaniadto ang atong kinabuhi moabot pa og kapin sa 900 ang atong edad. Hinuon wa pa may mga polusyon kaniadto, unya kanunay pulos prutas ug utan ang ilang kinaon nga way kemikals nga abuno. Nagkaus-os lang ang edad nato dihang nagsugod nag kaon og karne.
Sa mga statistika sa United Nations, segun sa ilang makuting pagtuon sa kompletong han-ay sa pagturok sa mga ngipon nato, ilang nadiskubrehan nga makaabot diay kita sa edad kapin 100. Unya ang 120 nga edad, naa pa gyud sa kategoriya nga hamtong pa kini ug dili pa kana inutil nga tiguwang.
Sa atong henerasyon karon, matud pa niadtong tuig 2000 ang atong ''Mortality Rate" o kanang lebel sa edad sagad nga kita mabuhi, anaa sa 60 anyos.
Sa karon nga dekada, miusbaw kini ngadto sa 70-80 anyos na.
Sa ato pa diay, anam-anam mobalik kataas ang edad nato, kay karong panahona daghan nang nagpangedaron hapit mo 100 ug ubay-ubay na pod ang nag 100 kapin nga ginganla’g 'sentenaryan'. Duna na gani 120 kapin, apan wa pa makompirmar gumikan sa problema sa 'birth certificate'.
Unya ngano man lagi, karon duna may gihimugso pa lang patay na? Unya sagad sa atong mga batan-on karon abusado man.
Mao nga kadaghanan karon aduna nay nagkalainlaing sakit. Busa mga batan-on karon di gyud matiguwang, kay maglisud pa man gani makaabot sa kahamtong nga edad 100-120