Ang tungason paagason.
Mao kini ang gihimo sa kadagkoan sa Metro Cebu Water District (MCWD) diri sa among lugar sa Upper Sitio Fatima, Barangay Apas nga ilang gikonektahan og tubig.
Dili pa g’yud hinuon kaayo tanto nga kusog ang bul-og sa tubig apan bentaha na lang kay barato na ang presyo dili sama sa ‘tag P75 ang cubic meter nga gipabayad kanamo sa mga adunahan nga nag-negosyo og tubig sa MCWD.
Sa ngalan sa mga pamilya nga akong gitabangan aron makaangkon og barato nga tubig sa MCWD, ako magpasalamat g’yud nila ni Chairman Rene Mercado, General Manager Ernie Delco, Engr. Edgar Ortega ug Engr. Joselito Vidal sa distribution division.
Salamat kaayo kaninyo ug sa tanan nga taga MCWD nga miaksyon sa akong hangyo nga makonektahan og tubig ang mao nga hilit nga dapit sa Barangay Apas.
* * *
Tan-aw nako, ang problema sa MCWD sa kanihit og tubig matubag na g’yud pipila ka buwan gikan karon. Inigka kompleto na sa water-expansion project nga magkuha og tubig gikan sa Luyang River sa Carmen modaghan na ang suplay.
Gitug-anan ko ni General Manager Delco nga daghan sila og project aron pagtuman sa tinguha g’yud ni Chairman Mercado nga matubag ang panginahanglan sa katawhan.
Ang termino ni Chairman Mercado unya pa mapupos sa 2017 mao nga makaserbisyo pa g’yud siya pag-ayo aron makatubig ang daghang mga pamilya unya dili mahal ang presyo.
Gidayeg g’yud nako ni si Chairman Mercado kay ang mga nangaging chairman kaniadto motungha lang sa MCWD kun maghimo sila og board meeting, apan si “Sangay” kanunay’ng anaa sa iyang opisina aron masuperbisahan g’yud ang serbisyo sa MCWD.
Si GM Delco ‘sab diha’y naabtan nako nga alas 12 na sa udto apan wala gayud mopahuway, mihimo pa og “work-related meeting” kay daghan kaayo siya og giatiman.
Kana maoy pagserbisyo g’yud, dili kay para lang basta adunay trabaho nga makakuwarta. Saludo ko ninyo diha sa MCWD.
* * *
Uy, atensyon hepe sa Toledo City police nga si Ricky Delilis. Misiaw ang mga lungkab sa Toledo kay ang pagpamaligya og shabu wala man ‘sab masumpo diha sa Sitio Lawis, Poblacion ug sa dapit sa San Juan.
Patrolyahi ninyo sir kay ang mga tawo diha mitandi na karon sa imong lihok ug sa gipulihan nimo nga hepe sa Toledo. Palihug, aksyoni sir Ricky.