Kun kita mabansay na pag-ayo sa pagbaligya sa atong kaugalingon, walay katarungan nga dili kita mahimong eksperto sa paghalin sa bisan unsay buot natong ihanyag aron madani sa pagpalit. Hangtud ikaw nay pangitaon sa ilang panginahanglan. Wala ka may produkto, maoy ilang paliton ang serbisyo mo.
Ang tiunay o kamatinud-anon sa imong pakigsuod o pakiglambigit sa isigkatawo, produkto nimo kini nga mag-agni kanila sa pagsalig. Nga ang ilang mga panginahanglan, anha na kanimo kuhaon.
Mura ka’g ahente nga mosuplay pinaagi lang sa simple nga kidhat ug pahiyum. Matud pa, laway ray puhonan.
Tungod kay masaligan ka man, pwede ka hatagan daan sa bayad sa buot nilang paliton, busa may ganansya ka na. Apan ipakita nga matinabangon ka. Magpaalkanse sa ganansya, dili sa puhonan kay makabangkrap. Mawala unya ang bili sa kahago mo, nga inanay maluya ang gana sa imong paningkamot.
Matngoni gayud nga dili masubhan ang ekspektasyon sa ilang gipaabot diha kanimo, ang pagpakabana kanunay nga anaa sa kaabtik sa serbisyo. Kun ingon niini ang mahimong stratehiya sa imong pagbaligya, dili gyud mausik ang imong panahon. Kay giayo man sab nimo ang paggahin, nga matigom ang ginagmay nga kinitaan sa katarung. Nga kining tanan maoy bunga sa kakugi.
Ang tinuod lang, adunay puhonan kining atong ganansya, nga mao ang kaalam, kusog, kahimsog ug kinabuhi. Gihatag kini gikan sa Kahitas–an, aron kita molambo. Dayegon ang pagsunod sa kabubot-on niya aron di kini bawion.