Dunay maayong balita alang sa mga Sugbuanon kay naaprubahan na ang rekomendasyon sa LTFRB-7 nga minosan na ang pletehan sa mga jeep dinhi sa Central Visayas labi na sa Sugbo. Inay mga 7 pesos ug 50 centavos ang plete gihimo na lang kini nga 7pesos. Ang chairman sa LTFRB maoy miaprubar sa pagpaminos sa pletehan tungod sa kanunay nag pag-ubos sa presyo sa produktong petrolyo. Busa sugod kagahapon kinahanglan na nga 7pesos na ang inyong iplete nga maoy minimum nga pletehan. Ayaw namo pailad anang ubang konduktor nga 8pesos gihapon ang gipaningil sa mga pasahero, kinahanglan mag-andam mo’g sinsiyo kanunay aron dili makabalibad ang mga konduktor.
Brgy Libertad, Bogo City
“Nganong wala man ni panakpa ang mga drug pusher diri sa among lugar sir Jun daghan ba kaayo mga batan-on nga nagumon sa bisyo mao sad ni hinungdan sa pagkusog sa kawat diri kay hasta battery sa motor kawaton na man.”
Brgy Japitan, Barili, Cebu
“Kining among lugar Sir kay naghitak man ang shabu wala man gyud magpakabana ang mga opisyal namo sa barangay hinaut nga mahatagan dayon ni dinalian nga pagtagad kay daghan nang naamong nga mga inosente.”
Brgy Pulpogan, Consolacion, Cebu
“Sir Jun naay suyopanan diri nga balay nga gipadagan aning duha ka mga pusher diri nga babaye ug lalaki kusog kaayo ning ilang negosyo kay hapit kada gabii daghan kaayong manuyop saba ra ba kaayo labi na inig kaadlawon.”
Brgy Basak, Lapu-Lapu City
“Naay videokehan diri saba kaayo bisa’g kaadlawon na kay usahay manira alas cuatro na sa buntag mas samot ang kasaba kay magsyagitsyagit man kun mahubog ang mga mag-inom.”
Brgy Dumlog, Talisay City
“Sir Jun ako lang isumbong nimo ning dili maayo binuhatan sa usa sa among mga tanod diri kay maoy mangunay pagpasuyop sa gasolina gikan sa service sa barangay grabe na ang ilang pangawat sa gasolina.”
Brgy Guizo, Mandaue City
“Kami gyud diri ang apektado sa rota sa mga jeep kay layo na kaayo mi’g lakawon kay dili na man paagion diri sa among dapit ang mga PUJ kay adto ra CICC maayo unta’g mabalik na ang naandan nga rota.”
Brgy Tuburan, Danao City
“Ako lang unta ipaabot sa among mayor nga unta mapakgang ning nagkadaghan nga shabu diri sa among lugar wala gyud aksyon ang mga opisyales namo ug sa mga polis nga utro sad sa tinubdan sa ilegal drugs.”
Brgy Paril, Cebu City
“Sir Jun hangyo unta mi nimo nga ipabadlong ning kapitan namo diri kay ang Hilux nga sakyanan nga gipanag-iya sa siyudad gigamit man para kolekta sa gisuplayan og mangga sa kaugalingon nga negosyo kay gikan baya sa buhis sa mga tawo ang gipagasolina ana nga sakyanan SKV-420.”
Brgy Poblacion, Madridejos, Cebu
“Ipadangat lang unta namo kining problema namo diri bahin sa karsada kay guba na gyud kaayo dugay na kaayo ni namong sige’g reklamo pero hangtod karon wala man gyu’y gihimong aksyon ang gobiyerno bahin ani nga problema.”
Brgy Pagsabungan, Mandaue City
“Wala pa man gihapon ni masulbad ning problema sa eskina Pagsabungan kay kusog kaayo mopadagan ang mga tricycle driver kuyaw sa disgrasya dugangan pa aning gubaon nga karsada nga kun mag-uwan mapiksan gyud ang mga maglakaw nga mga tawo.”
Brgy Cogon-Ramos, Cebu City
“Sir Jun among hangyo nga mailisan ning nagbantay sa CR sa Ramos public market kay dili kamaong manglimpyo kanunay hugaw ug baho kaayo ang pansayan dugay na gyud mi sige’g reklamo aning nagbantay kay wa gyu’y nahimo sige lang pangayo’g bayad.”
Alang sa inyong mga reklamo text lang sa 09071678643