Ang bulawan diin kini gikosiderar nga kinamahalang hiyas sa bahandi. Apan sa atong pagkatawo, ang tiunay nga gugma maoy kinabililhong hiyas nga labaw pa sa bahandi. Pinaagi sa gugma, kun imo kining gimatuto nga matinud-anon, ang mga imposible wala'y dili nato mahimo sa dakong kasayon.
Adunay gahum ang gugma, nga nagdepende sa tagtungod nga naghupot niini. Ang gugma masinabuton apan usahay dili masabot ang gahum niini ngano nga naingon ana. Kay may situwasyon ang pagbati o emosyon, molabaw ang kasingkasing ug igo lang ang utok nga magpahiamgo sa pagmahay.
Ang gahum sa gugma naga-agad usab sa nagbaton niini, kun giunsa nato kini gipahimuslan. Ang Dios ang naghatag niini kanato aron ang gugma mapahinungod sa kabalaanon sa tinguha niya, nga sa atong pag-alagad lunsay ug tim-os gayud ipabati ang kamatinud-anon sa tiunay nga gugma.
Ang gugmang gihatag kanato, mahimong mawad-a’g gahum kun ato kining abusohan nga ang tumong nakatutok lang sa pagtagbaw sa kaugalingon. Nga wala'y dedikasyon sa uban nga makatabang.
Kuyaw ang sangpotan niini kay mao kini ang magtukmod nimo sa kahiwian o pagkadautan sa imong kinabuhi.
Ang gugma nga gipasulabi ang salapi aron maadunahan, kalagmitan ikaw nay himoong ulipon sa bahandi nga wa nay kahadlok tungod sa kahakog.
Kay mao nay mihari sa kasingkasing ang gahum sa bahandi nga maoy nagdiktar sa pagbuhat og dili matarong. Hangtud ang pagkatawo mo maduhig sa kadautan.
Mawala na ang gugma sa isigkatawo nga mao ang timailhan nga nakabaton kita'g gahum sa gugma alang sa isigkatawo ug labaw nang adto sa atong Dios.