Ipakiha ni Mayor Michael Rama ang mga konsehal nga miaprobar sa P13 bilyones nga Annual Budget sa dakbayan sa Sugbo apan mibutang og mga kondisyon kun unsaon niya paggasto ang kuwarta.
Ang usa sa mga kondisyon nga gilatid sa mga sakop sa Cebu City Council mao nga dili unahon sa pagpatuman sa mayor ang daghang mga infrastructure projects nga nagkantidad og P4.5 bilyones kun dili siya makabaligya og yuta sa South Road Properties.
Dili kini angay’ng ikasuko ni Mayor Rama tungod kay ang mga konsehal igo lang nga nagsunod sa kabubut-on sa mayor. Base sa 2015 Annual Budget, giklaro sa mayor nga ang mao nga mga proyekto ipatuman niya gikan sa halin sa kayutaan sa SRP.
Gusto lang maniguro ang mga konsehal, ilabi na si Konsehal Margot Osmeña, nga ang kuwarta sa dakbayan siguroon sa paggasto alang sa mas mahinungdanong proyekto nga makabenepisyo ang kinabag-ang katawhan.
Imbes mopasaka og kaso batok sa mga konsehal, ngano nga dili man hinuon maninguha si Mayor Rama nga makabaligya na siya og yuta sa SRP aron nga mapatuman na ang mga gusto niya nga proyekto?
Wala siya pugngi sa pagpatuman og mga proyekto apan kinahanglan nga tumanon niya ang iyang gilatid sa Annual Budget nga ang mao nga mga infrastructure projects pundohan gikan sa kuwarta nga halin sa mabaligya nga yuta sa SRP.