Dear Atty. Divine,
Duna ko’y pangutana bahin sa akong paliton nga yuta. Ang una namo nga gikasabotan sa tag-iya nga bayaran kini pinaagi sa data-data sud sa duha ka tuig. Sa diha nga mohatag na unta ko og downpayment miingon man ang seller nga iyang patongan og interest sud sa duha ka tuig. Wa pa ko mouyon sa maong kondisyon. Ang akong pangutana attorney kun makatarunganon ba nga butangan og interest sa seller ang akong bayranan sud sa duha ka tuig? - Mario
Dear Mario,
Kun ang duha ka tawo mosulod og usa ka kontrata o kasabutan, ang atong balaod nagtugot kanila sa pagbutang sa mga terms and conditions niini basta dili lang kini mahasupak sa balaod ug sila’ng duha magkauyon niini. Sa imo nga kaso nga gusto’ng patongan og interest sa seller ang bayranan nimo kaniya sa imong gipalit nga yuta pinaagi sa utang, wa man ko’y nakitang dautan niini basta magkasinabot lang mo kun pila’y interest. Actually, kanang iyang pagbaligya nimo og property pinaagi sa utang dako na kanang pabor alang kanimo kay ang uban nga mobaligya og butang cash man g’yud gani. Busa kun dili ra taas alang kanimo ang iyang ipatong nga interest wa ko’y nakitang rason nga imo kining balibaran. – Atty. Divine
* * *
Kun duna moy pangutana may kalabutan sa problema’ng legal palihug lang sa pagpadala sa inyong suwat sa Legal Corner sa Banat News V. Gullas St. Cebu City or email sa flores_divina@yahoo.com ug akong tubagon pinaagi sa akong column.