Si Maria ang nipadayag sa iyang magnificat agi’g pagpadayag sa iyang dakong pasalamat ngadto sa Dios gumikan sa panalangin nga iyang nasinati. Nga bisan pa man tuod sa iyang kaubos ang Dios nibuot nga siya mamahimong inahan sa ikaduhang persona sa Santisima Trinidad. Gilibkas sa iyang mga ngabil ang pagdayeg sa Diosnong kaayo ug gihimo niya mismo ang iyang kinabuhi ingon nga pagpadayag ning maong pasalamat.
Ning adlaw sa Pasko kita gidapit nga mamahimong mapasalamaton. Ug paagi sa pagpakita sa atong pagkamapasalamaton mao usab ang pagpuyo sa kinabuhing manggihatagon dili lang sa mga material nga butang kondili sa atong gugma ug panahon. Pagpasalamat sa Dios gumikan sa mga maayo ingon man sa mga dili maayo nga mga panghitabo sama sa gipakita ni Job.
Ning nagsingabot nga adlaw sa pagkatawo sa Ginoo atong ipakita ang atong pagkamapasalamaton pinaagi sa paghatag sa pinakamaayo nga bahin nato dili ang paghatag sa mga bati ug sobra gikan nato. Ang paghimo sa atong kinabuhi mismo ingon nga pasalamat ngadto sa Dios taliwala sa atong kakabus ug kaubos kay matud pa: What you are is God’s gift to you, what you will become is your gift to God.