Bag-ohay lang nato’ng gihandum ang adlaw sa mga santos ug mga kalag ug ang atong tawag sa maong paghandum "KALAG-KALAG".
Apan mangutana ko ninyo. Aduna bay kalag? Tinuod ba gud nga adunay kalag ang tawo?
Sa matag higayon nga adunay krimen nga mahitabo mosantop dayon sa akong huna-huna ang pangutana kun aduna bay kalag ang tawo. Kini labi na g’yud kun dili masulbad sa mga polis ang krimen.
Maoy magpasulabi sa akong huna-huna ang pangutana nga kun may kalag pa ang tawo ngano’ng dili man siya mobawos sa tawo nga mipatay kaniya o ba kaha ngano’ng dili man niya giyahan ang mga otoridad sa pagpangita ug pag-ila sa mga tawo nga mipatay kaniya?
Tungod niini namunga og laing pangutana ang una nako’ng pangutana. Dili kaha mugna lang sa huna-huna sa tawo ang kalag?
Whatever! Ang importante bag-ohay lang nato nga gihandum ang Kalag-kalag ug miadto mo sa simbahan alang sa pagpamisa sa kalag sa inyong mga patay ug miadto sa ilang mga lubnganan alang sa pagdagkot og kandila para gihapon sa mga kalag sa inyong mga patay.
Angayan lang gayud nga handumon ang mga mahal nato sa kinabuhi nga mitaliwan na ngadto sa laing kalibutan, may kalag man sila o wala. Ang mahinungdanon mao nga wala nato sila hikalimti bisan wala na sila sa atong mga kiliran.