Ang pag-utingkay sa mga anomaliya sa mga politiko nga nagkaatbang og partido nga nangambisyon og taas pa nga katungdanan sa 2016 election mao karon ang sibaw kaayong isyu nga gihisgotan sa magkatapok nga mga tawo nga mahiligon kaayo sa pagbayloay sa ilang hunahuna nga usahay mosangko na hinuon sa mainiton nilang panaglalis.
Sa nagkasuhi nilang baruganan dili gayud kalikayan nga adunay pipila ka mga tawo nga wala motuo niini ug maisogong mobarog sa pagpanalipod sa politiko nga gipasanginlang nangawkaw ug nangurakot sa kuwarta sa panudlanan sa kagamhanan.
Ang mga tawo nga mituo sa gipasangil nga anomaliya maoy atong mabati ang dili gayud matuis nga baruganan nga bisan kun unsaon pa sa pagpasabot nga politika ang hinungdan sa pagtumaw sa tanang pasangil nga anomaliya mahimo lamang gihapon nga walay kapuslanan sanglit gitak-opan na man ang pultahan sa ilang kaisipan.
Adunay moingon nga ang mga politiko nga nabulit na sa pasangil sa nagkadaiyang anomaliya dili na gayud angay pa nga hatagan og kahigayonan nga maghupot pa og katungdanan sa atong kagamhanan tungod kay nahisama na man kining sagbot nga walay kapuslanan ug angay na lamang nga isalibay sa basurahan.
Nunot sa dili mapilo nga baruganan ang mga wala motuo maoy ilang pagahimoon ang pagpatugbaw sa ilang mga hunahuna nga ang lintunganay sa tanan nga pasangil sa anomaliya mao gayud ang politika ug ang dakong tinguha nga suporta sa katawhan.