Gisaway si Presidente Benigno Aquino III sa pipila ka pundok tungod sa wala niini pagtingog kalabot sa pagpatay sa usa ka ‘transgender’ sa usa ka US Marine didto sa Olongapo City.
Tinuod siya maoy amahan sa tibuok nasud, apan wala kini magpasabot nga tanan na lang iyang hilabtan. Apan bisan pa man og motingog si Aquino niini unsa may mapaabot sa katawhan sa iyang pamahayag?
Ang mga imbestigador mas makatrabaho og maayo aron paghatag og hustisya sa biktima kun sila hatagan og kagawasan ug way pressure sa ilang gibuhat.
Hinay-hinay nang nasagolan og “political interest” sa mga grupong dunay kaugalingong agenda ang unta usa ka “murder case.”
Ang mga grupo sa “third sex” gusto nga hatagan og espesyal nga pagtagad sa gobiyerno ang maong kaso kay lagi kuno “hate crime” kini. Mura ba og dinaog-daog g’yud silang mga naa sa third sex.
Apan nganong kung ang mga sakop sa third sex ang malambigit og krimen nganong wala man silay tagawtaw? Gusto ba nila nga may dapigan ang mga awtoridad sa kaso? Kinsa may madaot ani?
Duna say laing pundok nga daan nang di ganahan sa Visiting Forces Agreement ug Enhance Defense Cooperation Agreement (EDCA) kay sa ilang tan-aw giyatakan niini ang soberiniya sa nasud ug way gihimo ang gobiyerno niini.
Pulos negatibo ang ilang tan-aw sa VFA-EDCA, wa sila nagtan-aw sa kaayohang nakuha sa Pilipinas gikan sa maong kasabotan nga mas dako pa itandi sa usa ka kaso sa pagpatay. Ang hulga sa external threat sa seguridad sa Pilipinas ug disaster response maoy rason nganong dunay VFA-EDCA.
Kining mga nag apil-apil, gigamit nga takoban ang kamatayon ni Jeffrey Laude aron iduso ang ilang mga interes ug agenda.