Angay’ng daygon si Mayor Michael Rama tungod sa tinguha niya nga daghang proyekto ang ipatuman dinhi sa dakbayan sa Sugbo karong sunod tuig. Tiaw mo, P19.2 Bilyones ang kinatibuk-an nga Annual Executive Budget nga iyang giduso sa Cebu City Council, apil na ang budget nga gisukip sa Special Fund.
Mosamot nga angay’ng daygon g’yud si Mayor Rama kun hingpit niya nga mapalihok ang mga tax collectors sa dakbayan, ang mga sakop sa City Treasurer’s Office (CTO), pagkolekta sa kantidad nga subra sa gisugyot niya nga budget.
Mag-unsa man kun dako ang gisugyot nga budget apan dili makolekta ang mao nga kantidad, wala gihapon kini kapuslanan kay ang mga proyekto dili man mapatuman. Sigurado nga kuti-kutihon pag-ayo sa mga konsehal ang mga sakop sa Local Finance Committee atol sa budget deliberation aron sutaon kun unsaon nila pagkolekta sa P19.2 Bilyones.
Ang kampo ni Mayor Rama dili magsapayan kun dili makolekta ang mao nga kinatibuk-an nga kantidad base sa giduso nila nga budget, basta maaprobahan lang kini sa konseho. Ang pag-aprobar og dako nga budget magkahulogan nga dako usab ang intelligence fund ug ang discretionary fund sa mayor.
Kini maoy butang nga dili makatugot ang mga kaatbang ni Mayor Rama kay ang intelligence ug discretionary funds mahimo’ng gamiton sa mga proyekto nga makabentaha lang ang Team Rama.
Mahimo nga bisan og dili pa mapatuman ang ubang proyekto tungod sa kakuwang sa nakolekta nga revenue, apan ang unahon sa mayor nga magahinan mao ang intelligence ug discretionary funds nga magamit aron mabentahaan ang iyang mga kontra sa politika.