Nakapuntos pag-ayo si Mandaue City Mayor Jonas Cortes sa pagpahinumdom niya ni Mayor Michael Rama nga ang ihawan sa dakbayan sa Sugbo daplin sa Mahiga Creek nakalapas usab sa balaod.
Tinuod, dugay na kaayo’ng katuigan nga ang ihawan sa dakbayan sa Sugbo mideritso lang pagpaagas sa iyang mga hugaw gikan sa inihaw nga kahayopan direkta ngadto sa sapa.
Dili makalimod niini si City Veterinarian Pilar Romero kay bisan sa panahon nga wala pa siya sa iyang katungdanan daan na nga wala tumana sa dakbayan ang lagda nga gilatid sa environmental laws.
Ang tukma unta mao nga ang mga hugaw, apil ang hinugas gikan sa giihaw nga kahayopan, i-undergo g’yud og waste water treatment facility apan wala man kini himoa.
Hinuon, dili maayo nga padak-on sa duha ka local chief executives ang pagpasanginlanay kun kinsa kanila ang wala motuman sa balaod. Tukma nila nga himuon mao ang pagtinabangay aron mobalik ang naandan nga gilapdon sa Mahiga Creek.
Ang mao nga sapa kaniadto giingon nga masudlan pa og sakayan lahos ngadto sa taytayan sa Barangay Subangdaku apan karon anha ra kutob ang sakayan sa bukana sa sapa.
Dili man sayop nga adunay footbridge nga tukoron lagbas sa sapa apan kinahanglan nga dili maabot sa tubig kun magbaha aron dili makasagabal sa bul-og sa tubig-baha.
Apan husto si Mayor Rama nga angay’ng panggub-on ang mga tulay nga makababag sa tubig-baha kay usa kini sa makaingon nga mosuyla gikan sa sapa ang baha.