Hapit tanang establisamento dinhi sa ato sa Sugbo, labi na mga bangko ug mga department store, duna nay CCTV or closed circuit TV isip panagang sa mga dautang elemento sama sa mga kawatan, holdaper, ug uban pa.
* * *
Matud sa usa ka daku-dako sa kapolisan epektibo kining modernong kahimanan batok sa mga tulisan, kay makita man sa TV ang pagahimuon sa mga kriminal.
Apan daghan na ba ang mga tulisan nga nadakpan gumikan sa CCTV? Matud pa niining daku-dako sa kapolisan nga atong gihisgutan daghan nang nailhan ang mga nawong sa maong mga tulisan ug gipangita pa kini.
* * *
Didto sa Amerika, kasagaran sa mga tindahan ug mga puluy-anan duna say CCTV, apan suma pa sa usa nato ka tinubdan kining CCTV giparesan og burglar alarm. Ug suma pa kuno sa estatistika ang burglar alarm maoy mas daghan nakapakgang sa kawat o tulis kay mosiyaok man.
* * *
Inigtingog sa alarm natural nga maalarma ang kawatan o tulisan ug mapakgang ang dautan nilang tuyo. Kasagaran dili madakpan kay manguripaspas og dagan. Pero, at least, naluwas sa kawat ang biktimahunon unta.
Suma pa sa atong tinubdan, sa komunidad nga iyang gipuy-an sa Amerika, hapit tanang panimalay duna gyuy burglar alarm gawas sa ilang giinstalar nga CCTV.
* * *
Ato ra ning estorya sa giestorya ra sad kanato sa atong tinubdang higala. Basin pa lang makatabang sa pagpatunhay sa kampanya sa kapolisan batok sa mga kawatan.
* * *
SA LAING BAHIN ... Maayong adlaw diha sa atong mga higala nga drayber sa jeepney, taxi ug bus. Salamat sa inyong nagpadayong suporta sa Banat News.