Gubot kaayo ang demolisyon sa kabalayan daplin sa Mahiga Creek kaniadto’ng Martes. Supak sila nga papahawaon kay gusto g’yud nila nga magpabilin sa mao nga dapit. Kaniadto pa’ng tuig 2012 sila nga gipahibalo papahawaon sila ug kaniadto lang Martes sila gipugos pagpapahawa tungod sa ilang pagmagahi.
Dili sila gusto nga mopuyo sa dapit nga pabalhinan kanila tungod kay matud pa nila kini lapokon, bahaan, duol ra sa dagat ug sapa, ug nagtuo sila nga papahawaon ra gihapon sila sa dapit kun dili sila makabayad sa tag P1,800 nga bayranan sa yuta ug balay nga ila na’ng mapanag-iya sa paglabay sa 25 ka tuig.
Ang rason sa mga squatters salimbong lang sa tinuod nga hinungdan sa dili nila pagpahawa sa dapit. Ang tinuod, ang mga dili gusto nga mopahawa sa dapit nanalipod lang sa ilang mga interest nga naapektohan. Ang nag-awhag sa uban nga dili mopahawa sa lugar mao kadtong mga nagpaabang og daghang mga kuwarto, mga professional squatters.
Adunay duha ka dagway ang mga squatters. Sila mao ang tinuod nga squatters ug ang dili tinuod. Ang duha adunay kalainan. Ang tinuod nga squatters mohangop gayud sa tabang nga itunol kanila sa gobiyerno tungod kay mao na kini ang kahigayonan nga mahiluna sila sa ilang pagpuyo ug dili na mabalda pa sa hulga sa demolisyon.
Ang tinuod nga squatters mapasalamaton nga modawat sa tanyag sa gobiyerno nga balay ug yuta sa bayad nga barato ra. Ang tinuod nga squatters dili mamili sa dapit nga papuy-an kanila ug gani magpasalamat pa sa gobiyerno tungod sa paghatag kanila og dapit nga kapuy-an nga ila na. Ang tinuod nga squatters dili borokinto ug dili modemanda sa gobiyerno kun asa sila ibotang tungod kay ang ilang gusto mahatagan lang sila og kapuy-an nga matawag nga ila na.
Ang mga dili tinuod nga squatters mga hilas ug mamili sa dapit nga itanyag sa gobiyerno diin didto sila papuy-a. Ang mga dili tinuod nga squatters gusto nga sa dapit nga ilang balhinan daw sama sa subdivision o ba kaha condominium.
Busa mosupak gayud sila nga papahawaon ug ibutang sa dapit nga dili tukma sa ilang kaprisyo. Dinhi nasayod na kita kun kinsa sa mga taga Mahiga creek ang tinuod ug dili tinuod nga informal settlers o squatters.