Diha sa kalibutan sa mga damgo, ang hagdanan dunay ikasulti usab. Mahinungdanon kaayo nga imong tan-awon ug aninawon ang imong kahimtang sa maong damgo uban ang hagdanan. Nisaka ka ba? Nanaog ka ba? Kun nisaka ka timaan kini nga diha kanimo ang ambisyon ug hataas nga panlantaw uban ang mapaningkamoton nga kinaiya. Ang maong ambisyon maoy nagtukmod kanimo diha sa paglahutay. Sa laing bahin, kun nikanaog ka sa maong hagdanan, posible nga nahimo kining pahinumdom kanimo nga tingali nahimo kang emotionally down o depressed nga tungod niini bug-at alang sa imong buot ang pagsinati og kapakyasan. Dugang pa, pahinumdom usab kini nga kinahanglanon nimong motugdon sa reyalismo sa kinabuhi ug makab-ot lamang kini kun maantigo kang mopaubos.