Ang mga local chief executives sama sa mga mayor ug gobernador makahimo sa pagpangandoy og dako nga budget aron gastohon sa tagsa-tagsa nila ka local government unit.
Apan kon ang isugyot nga kantidad sa budget makuli na gani makolekta sa mga tax collectors, dili kini maayo nga ipamugos kay sama ra nga maghatag kita sa katawhan og damgo nga walay katumanan.
Kon maaprobahan ang budget magtuo ang katawhan nga ang mao nga mga proyekto mamugna na gayud para kanila apan dili diay mapatuman kon dili makolekta ang kinatibuk-an nga kantidad.
Kini maoy rason nga ang mga legislative bodies sa mga Local Government Units (LGU) mosukit-sukit gayud pag-ayo sa mga sakop sa Local Finance Committee kon makolekta ba nila ang kantidad ug asa nila kini kuhaa.
Sa dakbayan sa Sugbo, gitan-aw karon sa mga sakop sa Local Finance Committee kon makolekta ba nila ang P35 Bilyones nga maoy gusto ni Mayor Michael Rama alang sa 2015.
Apan si City Treasurer Diwa Cuevas ug kanhi konsehal Jose Daluz III, ang representante ni Mayor Rama diha sa Local Finance Committee, dili makapaniguro nga ang kantidad ilang makolekta.
Bisan og ang 45 hektareyas nga kayutaan sa South Road Properties (SRP) nga buot ibaligya sa mayor mahurot pa sa pagkahalin, dili gihapon kini makaabot og P35 Bilyones.
Gani daghan pa kaayo nga mga proyekto nga para unta karong tuiga ang wala pa mapatuman kay wala pa makolekta ang mao nga kantidad aron gastohon niini.
Ang angay’ng hatagan og dali nga pagtagad mao g’yud unta ang suliran sa paglunop-baha, pagpanindot sa karsada, ug unya na lang ang pagmugna og mga building nga dili kaayo dinalian ang panginahanglan.