Maayo kaayo ang gilaraw ni Kongresista Samsam Gullas nga kundili na palapdan ang karsada sa Naga, San Fernando ug Carcar, ang gigahin nga P80 milyones niini, adto na gastoha sa road widening sa karsada sa Manipis, Talisay City.
Alang kang Kongresista Samsam anugon kaayo’ng matanggong ang maong salapi, busa kay daghan man nga babag sa Naga-Carcar nga road widening project, mas maayo pa nga gamiton kini sa pagpalambo sa karsada sa Manipis.
Nagtuo ang Espada nga suportahan usab kini ni Mayor JVR sa Talisay ug sa mga sakop sa iyang konseho tungod kay sila man maoy direkta nga apektado sa kalisud ug kakuyaw sa pag-agi sa Manipis road, ilabi na panahon nga ting-uwan kay matabonan man kini sa dinahili sa yuta.
Si kanhi kongresista Eddie Gullas miawhag nga ipadayon g’yud ang pagpalapad sa karsada tali sa Naga ug Carcar.
Apan ang tingog sa dakong opisyal sa DENR Manila maoy giagad sa tanan, ambot lang kaha kon makombinse ba kini ni kanhi kongresista Eddiegul.
Ang pait gud kay dili man mapalapdan ang maong karsada gawas kon habason ang mga punoan sa mga karaang kahoy nga anaa sa daplin niini.
Unya maldito man ang mga environmentalist kay inig-andar na sa chain saw sa taga DPWH nga mamutol sa kahoy, pakatkaton man dayon ngadto sa ibabaw sa kahoy ang ilang mga bata-bata.
Peligro kaayo kon maputong gani ang taga DPWH ug mao na hinuoy gabson ang lawas sa maong tawo nga mokatkat, impas g’yud. (wencelen@yahoo.com)