Lupig sa mga environmentalist ang kagamhanang lokal ug mga ahensya sa gobiyerno kay nakabig man nila ang mga suheto sa kahoy nga dili na lang pahilabtan ang mga acasia ug uban pa’ng kahoy daplin sa national highway sa habagatan.
Aron walay kabalak-an sa umaabot nga panahon, mas maayo pa’ng pasagdan tuod ang maong mga kahoy ug maghimo na lang og laing karsada sa hawan nga wala nay kahoy sa duol sa luna diha sa mga siyudad sa Naga ug Carcar.
Mas maayo pa nga anha diha ibubo ang kuwarta sa gobiyerno kay sa mahiadto sa bulsa sa mga opisyal nga maldito.
* * *
Misimpatiya ang Espada sa sentimento ni Talisay City Administrator John Yre De los Reyes kinsa mibati usab og kahiubos batok sa mga nagbugal-bugal sa iyang papa nga si Mayor JVR.
Walay anak nga dili mahimangod kon sawayon ang iyang amahan sa ubang tawo, ilabi na ang bahin sa iyang edukasyon.
Kay ngano ba usab tuod nga gihugopan man pagbotar sa mayoridad nga taga Talisay si mayor JVR kon ang basehan pagpili sa mga tawo’ng pahupton sa maong posisyon mao ang pagka-manggialamon?
Para sa Espada, usa ka pagbugal-bugal sa katungod sa mayoridad nga Talisaynon ang pagtamay sa ilang gipili nga mayor kay ang edukasyon, ikaduha lang ug ang kaayo’ng moplano, dili madaug-daogon, buotan, manggiluy-on, ug dili kawatan maoy numero uno nga kuwalipikasyon nga angay huptan sa mga opisyal sa kagamhanan.
* * *