Bisan asang dapita karon sa kalibotan dunay mga kasamok nga nanghitabo. Sagad sa giawayan ang politika, teritoryo, kalainan sa ilang relihiyon, resources ug ning bag-o, terorismo nga nagtakoban sa relihiyon.
Bulahan kaayo ang Pilipinas nga buwag-buwag ang mga isla niini ug lisod ang pagkuyanap sa kagubot, butang nga angay ipasalamat sa mga Filipino. Sa Middle East, “linya” ra ang utlanan sa managsilingang nasud, paspas kaayo ang pagkatap sa kagubot ug uwahi nang makaaksyon ang ilang mga gobiyerno.
Sa Iraq, gimasaker sa teroristang Islamic State of Iraq and Syria (ISIS) o naila usab sa tawag nga Islamic State of Iraq and Levant (ISIL) ang mga inosenteng sibilyan tungod lang kay di sila parehas og pamaagi sa ilang pagtuo sa relihiyon.
Ang ISIL o ISIS nga Sunni Muslims mideklarar na og ‘caliphate’ sa amihanang Iraq, pipila ka lungsod sa Kurdistan ug Syria, usa ka religious ‘de facto’ government. Mas grabe pa sila kabangis sa Al Qaeda terror group o Taliban sa Afghanistan mao nga giisip na sila nga dili teroristang organisasyon kondili usa ka teroristang nasud.
Gisayon-sayon ra sa ISIL o ISIS ang Iraq ug Syria, tungod kay way panaghiusa ang mga tawo sa maong duha ka nasud. Sa Syria, dunay civil war, sa Iraq pulos diskumpiyado ang mga Sunni Muslims ug Shi’ite Muslims sa usa’g-usa, gikalimtan nila nga sila mga Iraqis. Apan sa Kurdistan, ang lumad nga Kurds nga gitawag og Peshmergas nagpabiling lig-on tungod kay wa nila isipa ang relihiyon ug giatubang ang kaaway isip mga Kurds.
Unta sa Pilipinas ingon niini ang kinaiya, magkahiusa sa usa ka tumong inay magkabuwag-buwag.